Analisis di manipulacion cu hamber y dolor di un Pueblo abusa
*Na 2017 Mike a nenga responsabilidad cu el a entrega na Evelyn
*Misterio a rondona un penthouse ora Aruba a keda sin placa
ORANJESTAD (AAN) — Cu Mike Eman ta capaz pa dirigi un show barata, manera a wordo presenta na e Representacion di Hulanda na Aruba, ta algo cu ya Pueblo di Aruba no por puntra su mes.
Mike Eman a bira e unico politico di Aruba, cu tabata activo for di momento cu Aruba a bira pais, te awe. Of no……no completamente pasobra tin momento cu Mike a bay sconde y su penthouse a keda bashi.
Pa yega na e momento cu Mike a bira un misterio y Aruba un realidad di desesperacion, mester bay na e momento cu BBO a wordo introduci y Mike porfin a haya e oportunidad pa duna prueba cu e ta maestro den e arte di manipulacion, cu ta realmente e aspecto mas importante di un politico cu no ta lider.
Tur loke Mike a presta tabata basa riba aventura hasta den cifranan cu a bira magia den su man.
E aventura mas grandi a wordo entrega na Aruba na 2017 den forma di herencia di Mike, cu a laga atras un debe cu a kibra record, un proyecto Citgo cu a costa Aruba mas placa na fiestanan publico y cu a bira origen di un rapport cu yama Refineria di Aruba, cu ainda ta den man di Ministerio Publico.
Cu un futuro economico mas scur su un anochi sin luna; un situacion financiero cu a exigi Hulanda di mara e mannan autonomo di Aruba; un futuro destrui, Mike cu a logra un mayoria marginal na eleccion, a dicidi cu ta Evelyn Wever-Croes mester a bira Prome Ministro di Aruba.
Mike a desaparece pa forma parti di e grupo sumamente chikito di Arubiano, cu no mester traha pa nan biba den un Penthouse, cu a bira un misterio pasobra ningun hende tabata sa algo di Mike Eman.
Evelyn Wever-Croes mester a dirigi Aruba cu na 2020 porfin a logra yega na un presupuesto den balansa, ora un pandemia a dal Aruba.
Resultadonan di e pandemia a uni cu e resultadonan di gobernacion di Mike Eman, cu a laga debe atras y no reservanan cu Aruba tabata tin mester pa e por a sigui cana.
Evelyn Wever-Croes a bira e Prome Ministro cu mester a atende cu Hulanda pa por a enfrenta e realidad di pandemia (cu a uni na e herencia di Mike).
Aruba a sobrebibi pero no tabata conoci cu e guera di petroleo na 2021 ni e Guera di Ukraine di 2022 cu a destrui economia mundial.
DIARIO a adverti Aruba pa e realidad pa cual tur organisacion mundial a bati alarma cu tabata e guera di Ukraine, cu pa Mike a bira un oportunidad nobo.
Pasobra ora Mike a realisa cu Evelyn Wever-Croes a saca Aruba for di e poz hundo ocasiona pa Mike, pandemia y Rusia, Mike a mira un futuro nobo pa Mike.
Rapportnan di instancianan y expertonan local y mundial cu DIARIO a presenta, ta papia di e resultado pisa di e combinacion di Pandemia y Ukraine, sin tene na consideracion cu na Aruba mester inclui Mike Eman den e plaganan cu a dal Aruba.
Awe Mike kier baha Gobierno na momento cu su “back to back” Benny Sevinger ta bolbe bira protagonista principal di e novela “Tereno”, cu Huez mester atende.
Mike a baha for di su Penthouse pa entrega un carta na Hulanda den cual Mike, cu Hulanda a baha for di Fort Zoutman, ta acusa Evelyn Wever-Croes di mal gobernacion.
Mike tin den su man e bom perfecto pa destrui trankilidad na Aruba. Debe cu el a laga atras uni na Pandemia y Ukraine ta fatal pa futuro di Aruba.
Pero pa Mike e ta oportunidad pa ripiti su maniobra di uza BBO pa Pueblo lubida e caso di Fondo Desaroyo Nobo San Nicolas y asina asumi poder.
Napoleon, cu a destrui mobleza di Francia pa e mes bira emperador, ta keda chikito banda di Mike, cu kier causa un revolucion politico cu loke su propio herencia a ocasiona, cu ta debe pa e Arubiano paga.
For di su penthouse e por mira abou riba e Pueblo cu el a manipula, manera tur documento ta proba y yega tambe na e forma ideal pa kita bista for di su “back to back”, Benny Sevinger, cu oficialmente ta wordo acusa di a haci negoshi personal cu e suelo sagrado, e terenonan di Aruba!
