ORANJESTAD (AAN): E prome Debate Politico di 2021 lo bay ta Diahuebs otro siman, esta 3 di Juni 2021.
E di dos lo bay ta Diahuebs 17 di Juni 2021, y ambos ta wordo organiza pa Camara di Comercio.
Durante un conferencia di prensa teni na KvK, un di esnan na cabez di e Comision di Debate na Camara di Comercio, esta Martijn Balkestein a splica cu durante e Debate lo bay tin 3 diferente tanda. Nan a escoge esey, pa haci’e na un forma hopi interactivo y e meta ta pa stimula e debate entre diferente lider politico.
Balkestein a mustra cu tur esaki ta un reto pasobra lo tin 12 diferente partido cu ta participa y mester haci esaki den formato cu ta keda placentero pa tur e partidonan politico y tambe pueblo, y tin di reparti esaki den tal forma, cu e preguntanan no ta wordo haci na tur lider politico, pero ta haci esey via trekmento di lot.
LOT PA CADA LIDER: Ora cu e Debate start pa 7:00 pm, lo bay tin mey ora di ‘Antesala’. Balkestein a yame un sorto di ‘Warm-up pa Debate’, unda algun diferente persona clave den comunidad lo papia y splica pakico ta importante pa bo haci uso di bo derecho pa vota cada 4 aña, y escoge cual persona bo ta kere lo por dirigi e pais.
Despues di e Antesala aki, ta start pa 7:30 pm, cu Tanda #1. Diferente hende a wordo acerca riba caya y diferente hende a wordo acerca riba caya caba, a ser graba cu 20 seconde di pregunta, y esaki lo wordo pasa riba pantaya pa tur 12 lider politico y tambe televidente mira.
Den Tanda #1, no ta tur politico lo bay contesta e mesun pregunta. Pa cada pregunta, lo trek lot, y 3 lider ta haya chens di contesta e pregunta cu e ciudadano a haci riba caya. Asina ta sigui cu e siguiente pregunta, y via lot atrobe 3 otro lider lo por contesta.
haci uosi di e chans pa ahaci pregunta. Nan a wordo filma caba y 20 seconde di pregunta y ta wordo displayed den studio Telearuba y via lot lo tin pa cada pregunta, 3 lider cu lo haya e chens pa contesta riba esaki.
Den Tanda #2 lo ta un poco mas detaya unda 12 diferente pregunta ta wardando riba nan caba! Balkestein a divulga cu e KvK team mes a pensa riba temanan cu ta toca situacion actual y situacion cercano.
El a bisa cu e preguntanan ta hopi amplio den Tanda #2, cu ta enfoca riba diferente aspecto cu ta importante riba bida diario di ciudadanoan y di un pais. Ta importante pa dirigi bo pais manera debe ser.
Aki por pensa por ehemplo riba temaan di ingreso y gastonan familiar cu ta toca nos tur awor den e pandemia. Esey ta punto toca tur hende, pa haya sa kico e lidernan politico ta pensa pa mehora e situacion di ingreso y gastonan familiar.
Tambe tin otro tema importante, e.o. Turismo y tambe Reforma Economico cu ta principal pa genera placa pa Aruba, y e pregunta lo ta con e lidernan politico lo bay visualiza futuro cercano y con lo bay diversifica turismo.
Lo pone spotlight tambe riba reforma laboral y reforma fiscal cu ta wordo papia door di diferente instancia internacional y local, y hasta KvK y ATIA ta boga pa un reforma laboral pasobra tin leynan poco rigido cu actualmente ta tranca e economia.
Pa e Tanda #2 tambe, e Reforma Fiscal tambe ta un punto cardinal cu a wordo cuminza cune par di aña pasa pero ainda no ta den formato finaliza. Tambe lo toca e tema cu ta hobennan y enseñanza, pa papia si acaso actualmente e nivel di educacion ta optimal ainda of si tin espacio pa optimaliza e tipo di enseñanza y habilidad cu ta rekeri awendia door di doño di trabao.
Balkestein a mustra cu lo tin tema relevante di envehecimento, esta salud y cuido medico. Nos tin di prepara pa cuida tur esnan di edad grandi y esnan cu ta sufriendo di malesa.
E lidernan politico lo tin di contesta tambe riba e pensamento pa cu inovacion tecnologico y con esey por facilita e bida diario di no djis e ciudadano, sino tambe sector priva y esun gubernamental.
Tambe lo papia di tema di husticia y segurddad, pasobra tur hende na Aruba merece di goza bida na forma trankil.
Un punto cardinal lo ta pa check con e lidernan politico lo bay mehora e efectividad di aparato gubernamental, y con nan lo bay baha e gastonan gubernamental, cu ta un exigencia den e Landspakket. Tambe e tema lo wordo toca, pa sa con e lidernan politico lo bay ehecuta plannan pa yega na finanzas duradero y sostenible.
