Por paga online fin di Mei y fin di Juni tambe...
ORANJESTAD (AAN): E deadline ta final di otro luna, esta Diabierna 30 di Juni 2023. Pa e fecha ey, bo mester tin e di 2ndo mitar di plachi di number paga, of tambe henter aña.
Relacionista publico di Departamento di Impuesto (DIMP), esta Meverly Romano a splica cu nan ta recorda tur automobilista cu tin debe ainda pa paga, pa corda nan cu e fecha pa cu pago di e di dos mitar di aña ta yegando.
Pues ainda tin chens di bay paga online mitar na fin di Mei, y mitar na fin di Juni.
Esnan cu ta keda sin paga: Señora Romano a splica cu aworaki e automobilistanan cu ta faya hopi pa cu pago di plachi di number, ta esnan cu tin numbernan “A”. Te cu Dialuna mainta, un total di 13.153 doño di number di auto no a paga ni 1 cent ainda pa e plachi di number di 2023.
Esey nifica cu ya esnan cu A-nummer cu no a paga e 1er mitar, a haya un heffing di boet poni extra pa nan bay paga prome cu fin di Juni venidero.
Como 196 Truck di Diesel no a paga ni 1 cent ainda tampoco pa henter 2023. Pues nan tur lo tin di bay paga sigur prome cu e deadline di 30 Juni 2023.
Como 25% di motorcycle no a paga: Tambe DIMP a registra te cu Dialuna, cu un total di 674 motorcycle na Aruba no a paga ni 1 cent ainda pa plachi di number 2023.
Meverly Romano aki a mustra, cu e cifra di motorcycle ey ta igual cu 25% di tur e cantidad di motorcycle total registra na Aruba. Ta alarmante cu 1/4 di e motorcyclenan coriendo rond no a paga ainda.
E cantidad di plachinan di number cu ‘Nomber’ personaliza cu no a paga ainda, ta un total di 142 no tin pago mes riba nan.
DIMP ta notando cu un total di 235 vehiculo di plachi “T” di touring, no a paga ni un debchi pa cu e Impuesto di Motor pa 2023, esaki ta igual cu 71% di incumplimento den e categoria ey.
Tambe a nota cu di tur V-auto na Aruba, un total di 497 vehiculo no tin plachi di 2023 paga ainda. Esey ta como 10% di e total di V-auto coriendo rond na Aruba.
Deadline di pago: E fecha di Diabierna 30 di Juni 2023 no ta djis e ultimo fecha cu bo por paga pa e 2ndo mitar di 2023 di impuesto di motor, sino esey ta tambe e ultimo fecha cu bo por entrega plachi di number di auto of vehiculonan cu no ta den uso.
Pues di e vehiculo pa cualkier motibo no ta den uso den e siguiente tres lunanan, DIMP ta recomenda pa bo entrega e plachi di number di awor caba, pa evita cu ta bay paga belasting riba e periodo venidero. Aki si DIMP ta check cada cuartal cu e numbernan ta aden, pues si bo entrega e plachi aden aworaki, y despues bo ta busca e plachi bek por ehemplo na October 2023, e ora pa e 3 lunanan ey, pa 1/4 di aña nan lo no cobra belasting di e automobilista.
Esaki ta algo bon pa evalua, pa evita toch cu bo tin di bay paga, sin cu esey ta necesario.
