Señor Randall van Trigt di Stichting HUNTO
ORANJESTAD (AAN): Abuso di sustancia den nos hubentud hopi biaha ta e resultado di e problemanan social cu ta existi den nos comunidad. Hopi biaha, e hobennan ta crece den un medio familiar unda tata ta un uzador di droga, of simplemente no ta presente den famia. Mama, na su banda, mester traha dos of mas trabou pa por sostene e famia.
E realidad aki tabata un punto principal cu señor Randall van Trigt, di Stichting Hunto, a duna di conoce den un entrevista cu DIARIO siman pasa.
Segun e datanan cu Stichting Hunto a recolecta entre hobennan di edad 12 te 15 aña, por a conclui cu Aruba tin hopi trabou di conscientisacion pa haci riba e tema aki. Pa colecciona e informacion aki, e hobennan a yena un formulario cu preguntanan estrategico, y Stichting Hunto a analisa nan. E resultado a revela algun dato preocupante, entre otro, cu tin hobennan cu a indica cu nan mes mayornan ta bisa nan cu nan “no ta stima nan”.
Señor van Trigt a enfatisa cu e data aki ta fundamental, no solamente pa compronde e sentimiento di e hobennan, sino tambe ta un indicacion fuerte pa ahusta e maneho di Stichting Hunto, y sigur di Gobierno di Aruba tambe. “Nos tin cu cambia e manera cu nos ta trata salud mental na Aruba y bay di curativo pa preventivo pa nos no perde e bataya”, señor van Trigt a subraya.
El a agrega cu tur luna tin alomenos un hoben entre 16 y 19 aña cu ta bira adicto y ta termina riba caya. Segun van Trigt, e solucion no ta simplemente pa cera nan den, pasobra hopi biaha despues cu nan sali, nan ta bolbe cay den e mes situacion y ademas otronan ta bin acerca. “Nos mester tin un sistema structural pa preveni esaki,” el a bisa.
Analisando e problema di abuso di droga den hobennan, señor van Trigt a destaca cu e raiz di e situacion ta den e problemanan social den cas. “Niun cliente cu mi topa ta bisa mi cu nan ta gusta droga. Tur cliente ta expresa cu esaki no ta e bida cu nan ta desea pero no tin niun sosten pa yuda nan sali afo. Pa e motibo aki tambe Stichting Hunto ta sigui organisa diferente evento pa tanto hoben, mayornan, docentenan y pueblo en general. Cuido preventivo ta keda e solucion”, señor van Trigt a expresa.
