ORANJESTAD (AAN): Señora Dahariana Evertsz di Departamento di Salubridad Publico Aruba (DVG), a elabora riba e campaña grandi cu e departamento di salud ta promoviendo.
DVG, pa medio di e campaña aki, ta conscientisa y educa pa haci cambio den comunidad den manera mas positivo. E meta ta pa haci e scogencia mas saludabel, e scogencia mas facil. E campaña aki yama ‘Come Bon. Paga Menos’ y e campaña ta parti den diferente mini campaña riba diferente tema.
Bou di esaki, tin e mini campaña ‘Cambia Bo Slok’. Esaki ta trata di bebidanan cu ta contene suco. Muchanan ta haci loke nan mayornan ta haci, y si nan wak nan mayornan bebe bebidanan cu ta contene hopi suco, nan lo haci esaki tambe. P’esey, ta importante cu for di un edad tempran, muchanan mester wordo educa kico ta miho pa nan bebe pa hidrata nan mes.
Señora Evertsz a indica cu hopi biaha no ta pone atencion riba e labels di bebida entre otro di juice, chocolade melk, refresco, bebidanan di energia. Y ta bebe e bebidanan aki sin sa e cantidad di suco cu esakinan ta contene. Esaki ta conta tambe pa bebidanan di juice natural. Ta importante pa sa cuanto fruta a wordo primi y cuanto gram di suco tin den e juice.
El a remarca cu DVG ta sigui e standardnan di World Health organization pa loke ta trata e tema aki. E maximo cantidad di suco cu un persona ta wordo permiti pa dia ta 12 cuchara di te chikito. Esaki ta varia segun edad. Muchanan di 0-2 aña ta preferibel pa no duna nada cu ta contene suco, incluyendo juice natural of te. Y esaki mester sigui asina. Menos bebida cu ta contene suco, miho. Pa adultonan tambe, ta bon pa bebe te of koffie sin suco of cu menos suco. Tambe mester tene cuenta cu alcohol cu tin ingredientenan cu ta afecta salud si consumi esakinan a termino largo.
Na final, el a enfatisa, cu ora cu nos kier reduci e cardiovascularnan, ta miho nos bebe algo cu ta simpel y mas accesibel, cu ta awa. Y hopi biaha, nos no ta bebe awa. Cambia Bo Slok ta un link di e campaña ‘Come Bon. Paga Menos’ pa conscientisa comunidad di e cantidad di bebidanan cu ta contene suco cu nos ta bebe tur dia cu ta dañino pa nos salud. Pero e meta principal ta pa conscientisa muchanan te cu adultonan, di e beneficionnan cu awa tin pa nos salud, entre otro refresca, kita sed mientras ta elima bebidanan cu ta contene suco.
