Descubri cu nan ta contene Diclofenac
WILLEMSTAD: Departamento di Inspeccion di Salubridad Publico na isla di Curaçao, a emiti un advertencia serio y urgente pa dos producto cu aparentemente bo por cumpra unda cu ta riba e isla, cu ta bin den forma di bebida y ta haci comosifuera nan ta ‘natural’ anti-inflamatorio.
Ta trata di e productonan ‘Gaf Plus’ y tambe ‘Ultra Dolk’.
Autoridadnan na Curaçao a dicidi na investiga Gaf Plus cu e Number di lote R012MAR24 cu fecha di caduca MAR/2026, y tambe Ultra Dolk cu Number di lote R001ENE24 y fecha di caduca ENE/2026.
Den tur dos producto, a bin detecta presencia di Diclofenac. Pero ningun caminda riba e botternan aki no ta haci mencion cu tin Diclofenac den nan.
Posible riesgonan di Diclofenac ta: (*) Problemanan di stoma y tripa, e.o. sangramento. (*) Riesgo mas halto pa malesa di curazon y ader. (*) Defecto na higra y riñon.
E ta hopi peligroso pa pashentnan cu ta sufri di presion halto, bay bebe e supuesto bebida natural aki sin cu nan sa cu e tin Diclofenac aden. En general, pashentnan di presion halto no mag di bebe Diclofenac.
Mesora Curaçao a stop importacion, y tambe bendemento di Gaf Plus, y tambe Ultra Dolk cu e numbernan ey.
E boternan di Gaf Plus ta promove su mes den duna alivio na dolor di joints, y ta yuda kita cansancio, cu mas energia y menos dolor. Ultra Dolk ta wordo promovi como ‘bebida anti-inflamatorio’ y cu ta kita dolor di musculo y joints. Cada boter ta wordo bendi na como 50 Florin na Curaçao.
Segun Inspeccion di Salubridad Publico na Curaçao, e investigacion lo sigui pa check si tin mas Number di lote di e productonan cu ta contene ingredientenan cu no ta wordo pon iriba paki.
Di con e ta peligroso? Pasobra pa ley, Diclofenac ta un remedi cu tin di wordo registra. Ta prohibi pa importa remedinan no-registra na e isla, y pa colmo pa bende nan rond.
