WILLEMSTAD: Un boto di fruta y berdura procedente di La Vela na Coro, Venezuela, cu ocho persona abordo a wordo deteni door di Polisnan den St. Annabaai na Curaçao,
como cu a bin descubri cu tin droga scondi mey-mey di e cargamento cu nan a yega cune.
Esaki a socede como 6 luna despues cu a habri frontera bek entre Venezuela y Curaçao pa carga via lama. Aunke na Venezuela tambe prome cu e botonan aki sali ta haci hopi control, aparentemente toch a logra sconde hopi droga cu meta pa hiba nan rumbo Curaçao.
Ta asina cu Aduana di Curaçao a bin descubri cu mey-mey di e cargamento di carbon, a bin haya droga, arma, y municion abordo di e boto “Expomar”. Tur esaki a wordo confisca. E capitan di e boto tambe a keda deteni, como cu e ta responsable pa e cargamento.
Ademas di Aduana, oficialnan di control di Ministerio di Asuntonan Economico tambe a bay haci control, y a bin descubri cu tin cargamento di promenton cu ta contamina.
Oficialnan di Inspectie Volksgezondheid di GMN Curaçao, a bin detecta cu casi tur promenton abordo di e boto aki ta contagia cu varios malesa y tin pest riba nan.
Mesora a duna instruccion pa destrui e cargamento di riba 300 kilo di promenton. Berduranan contamina no ta djis peligroso pa salud, pero por conduci tambe na perdida di produccion na agricultornan local. Pa colmo, e importador no tabatin permiso pa trece e berduranan aki tampoco.
Pa colmo, e boto a presenta cu un certificado fytosanitario pa e promentonnan aki. E certificado aki ta wordo duna solamente ora tur condicion, incluyendo un inspeccion di e carga, ta wordo cumpli cune.
