ORANJESTAD (AAN): Durante e recien Accion di Bario na Cura Cabay Zuid, habitante Loreto Werleman a expresa su preocupacion
pa e parke recreacional cu tin den e compleho di Cura Caya Zuid. Loreto Werleman tin desde su binticinco aña bibando den e bario y no a mira nada mas tuma luga cu deporte den e parke.
Werleman su miedo di mas grandi ta di mira cu e adictonan ambulante a podera di e area aki y stroba e muchanan di e bario haci uzo di dje. Tin basta destruccion a tuma luga caba, luznan kibra y e peliger di laga mucha chikito bin hunga riba e veld, ta riesgo cu e mayornan no ta tuma.
E presencia di algun individuo cu menos bon intencion tambe ta algo cu semper nan ta alerta riba dje. Lo ta ideal si por mira mas siguridad y coordinacion di e cancha deportivo. Un persona cu por encabesa y dirigi actividad riba e veld caminda tur mucha por hunga trankil.
Mirando e esfuerso cu e gobierno di AVP-Futuro ta haciendo pa un biaha mas revitalisa cada compleho rond nos isla, Loreto ta convenci cu Cura Cabay Zuid tambe pronto lo mira un parke renoba y apto pa tur hoben por recrea sanamente eyriba un biaha mas.
“E ta un trabao di boluntad”, ta loke Loreto Werleman a indica.
