ATA preocupa cu otro reto: - *Mester atende turistanan segun protocol - *Ta evalua cantidad di casonan di Merca
ORANJESTAD (AAN): CEO di Oficina di Turismo, Ronella Croes, a indica den conferencia di prensa di Gobierno y Crisis Team cu pa loke ta e casonan positivo na Covid-19 bao di e no-residentenan, e tendencia cu ta mira aworaki ta cu mayoria di nan ta di Merca, cual ta e mercado cu ta treciendo mas bishitante.
Un gran parti di nan ta hoben asintomatico y mayoria ta test positivo ora cu nan haci e test ora cu nan tin cu regresa Merca.
Ta gara e turistanan aki na salida, despues cu nan a disfruta caba di nan vacacion na Aruba, a señala.
No sa si mayoria ta vacuna of no. Esaki ta un dato cu ta pendiente.
Mester tene cuenta cu bao di no-residentenan tin studiantenan tambe di Aruba cu ta akinan cu vacacion.
Ademas di e reto di e impacto riba e recuperacion turistico, por mira cu e hospitalisacion ta bao control. Esaki ta un indicador cu ta wordo monitorea, pero no ta un indicador cu ta dunando preocupacion na e momento aki, a bisa.
Di otro banda, den e etapa aki di maneho di e virus tin un otro aspecto cu ta forma parti di e protocol cu si ta dunando mas preocupacion y esaki ta uno cu ta cay bao di e maneho di ATA.
E protocol ta indica cu ora un turista ta test positivo ta sak'e for di su lugar di acomodacion y ATA ta sigura un acomodacion alternativo p'e. Esaki tabata e maneho for di ora cu a habri e frontera na Juli 2020.
Cu un Aruba cu ta mas yen y cu mas demanda y cu mas acomodacion den uzo, e cupo y inventario di acomodacionnan alternativo aki ta yegando na nivelnan critico y ta dunando ATA e problema na varios momento pa por acomoda e turistanan conforme e protocol defini, Croes a splica.
Ta sigui traha riba esaki sigur, pero ta un ehempel di un reto cu kisas hopi no ta pensa riba dje, pero cu na lugar di wak hospitalisacion como un punto di preocupacion ta bira wak aworaki un otro aspecto di e protocol como un punto di preocupacion.
E cantidad di casonan cu ta ricibi di Merca ta algo cu mester a evalua di cerca tambe, e ehecutivo di ATA a enfatisa.
