Inspector di Remedi, Roselynn Angela:
ORANJESTAD (AAN) – Inspector di Remedi, señora Roselynn Angela, ta splica cu un remedi registra tin indicacion di e motibo pa cual e ta wordo prescribi.
Señora Angela a señala no ta algo cu no tin un efecto secundario y p’esey tin asina un control riba dje, na tur caminda di mundo, pa trahamento, importacion y benta di e remedi.
“E por ta peligroso, vooral esnan cu ta wordo prescribi cu receta y cu mester guia di un docter. Pasobra si e pashent tin otro malesanan, otro complicacionnan, nan por afecta e pashent cu riesgo cu e por wordo interna den hospital, of cu e por fayece tambe. Pues, tur remedi cu bo bebe no ta un suplemento, no ta algo cu no tin efecto riba bo. Tur remedi tin efecto riba bo!” Inspector Angela ta subraya. Y dependiendo di ken mag di bende y na unda, por tin riesgo tambe pa e persona, el a enfatiza.
El a comenta cu kico nan a haya den e parti ilegal, ta hopi remedi cu ta bin di Latinoamerica, cu no ta e sistema di Aruba, tambe nan a haya steroid for di United Kingdom, y nan tambe ta sumamente peligroso, tin su riesgonan cu ne.
“Ademas a haya antibiotica cu ta bin mas tanto di Latinoamerica, y e pashent por bira resistente, of un bacteria por bira resistente na e antibiotica cu consecuencia cu den futuro ningun antibiotica por mata e bacteria ey, y e persona cu ta tume por muri di un griep cu normalmente, tin tratamento p’e, of un bronchitis cu bo por cura door di antibiotica, pero door cu e remedinan no ta traha mas riba e bacteria, e ta bira asina riesgoso cu e pashent ta muri di dje”, Inspector Roselynn Angela a reitera.
E siguiente stap ta cu Inspectie ta bezig cu tur e instancianan concerni pa nan traha hunto. Nan a cuminza caba na Maart-April cu un lazo hopi estrecho, y aki ta e parti cu nan ta bay door di Douane tambe pa e esnan cu ta cu uzo personal, p’asina ey haci e hendenan conciente tambe cu loke nan ta haciendo, no por! Y, cu tin consecuencia.
