ORANJESTAD (AAN): Ta celebra fin di aña, mientras hopi di nos fiel amigonan di cuater pata ta sufri den silencio.
E buya di e klapchinan ta un motivo di stress y miedo pa hopi di e bestianan. Esaki no solamente ta afecta nan bienestar, pero tambe por causa daño fisico si nan no ta recibi e cuido adecuado. Pesey, ta importante pa comunidad ta mas consciente y tuma accion pa proteha tanto nos mascotanan como e animalnan ariba caya.
Tecnica Tellington TTouch: Un metodo util contra stress
Un di e metodonan mas efectivo y senciyo pa calma bo mascota durante e tiramento di klapchi ta e tecnica conoci como Tellington TTouch. Esaki ta consisti den uza un sorto di 'verband' anti stress pa mara un tela na cierto punto sensibel di e curpa di e bestia. E tela ta duna nan un tipo di presion suave, cu ta calma nan sistema nervioso, reduciendo miedo y ansiedad. E ta un opcion natural y sigur pa yuda nan sinti mas trankil.
Otro medida pa proteha bo mascota:
-Crea un espacio safe: Haci un luga den cas pa bo mascota, cu cusinchi, su paña faborito, y si ta posibel un aparato cu ta blokia ruido.
-Mantene nan hidrata y bon alimenta: Antes di e celebracionnan, duna nan suficiente awa y cuminda. Un curpa satisfecho ta contribui na un mente mas trankil.
-Proteha nan contra elementonan natural: Asegura cu nan tin un luga pa proteha di solo y awacero si bo mascota ta pasa tempo den patio.
Y cu e animalnan di caya?
No por lubida e animalnan di caya, cu ta hopi bes no tin un luga safe. Esaki ta algun cos cu por haci pa yuda nan:
- Laga awa y cuminda den un skina: Coloca un baki cu awa fresco y un poco di cuminda pa nan.
-Crea un refugio temporal: Si bo tin posibilidad, instala un caha of un luga pa nan busca proteccion.
-Informa organisacionnan: Si bo nota cu algun animal ta sufriendo, contacta algun di e organisacionnan cu ta cuida di animalnan pa wak si nan por duna un mas. Hopi biaha nan ta man yen di caso den e temporada aki, pero toch wak te na unda bo persona por yuda tambe.
Cuida di bo mascotanan y animalnan di caya durante e temporada di fiesta ta un acto di amor y responsabilidad. Tur accion, grandi of chikito, ta conta pa crea un ambiente mas safe y humano pa esnan cu ta depende di nos.
Na final di cuenta, alegria y celebracion no tin balor si e ta costa sufrimento di esnan cu tanto amor ta duna nos durante e resto di aña.
Cuida, proteha y celebra responsablemente. Bo mascota merece esey.
