Ministro Dangui Oduber ta satisfecho
ORANJESTAD (AAN): Dialuna atardi Minister di Turismo y Salud Publico sr. Dangui Oduber conhuntamente cu management di ATA, Board di ATA, management di AHATA, representante di Grand Thorton y ministerio di Turismo tabata presente pa un reunion di ATA su reportahe anual.
Ta pa remarca cu e indicadornan cu ta midi resultado a demostra cu aña 2023 tabata e miho aña den historia di Aruba pa cu turismo.
Minister Dangui su maneho ta basa ariba: (1) Trece e turista afluente y di calidad. (2) Diversifica nos turismo innovando producto Aruba. (3) Haci inversionan continuo den mehoracion di producto Aruba. (4) Crece Aruba cu un turismo sostenibel.
ATA a presenta e indicadornan cu a midi aña 2023 su logronan, unda a utilisa 90% di e presupuesto pa mercadeo y promocion di Aruba. Indicador principal cu ta midi e resultadonan ta tourism receipt, tourism arrivals y average daily spend. Tourism receipt a crece cu 13.4% compara cu 2019, indicando un recuperacion fuerte y mas placa den nos economia. Ta pa remarca cu tourism receipts tabata mas halto cu e yegada di turistanan y esaki ta indica un cambio positivo den cantidad di turista pa calidad di turista.
Loke ta remarcabel ta e crecemento registra for di nos mercado principal cu ta e mercado norte americano. ATA ta mercadia den diferente mercado, como Norte Americano, Sur Americano y Europa. Cada mercado tin nan mesun manera pa promove y ta adapta e mensahe y e promocion.
Ministerio di Turismo tin e responsabilidad pa segura cu Aruba su economia ta sigui crece mientrastanto liderando cu practica di un turismo sostenibel.
Proyectonan di sostenibilidad y innovacion ta aliniando cu e vision pa un sector turistico mas resistente y innovativo integrando tecnologia nobo pa mehora e experiencia total di e bishitante. ATA a presenta su “Destination Development Plan” cu a ilustra tur e proyectonan cu a cuminsa y lo worde ehecuta pa un turismo mas sostenibel.
Pa finalisa, Minister Dangui Oduber ta percura pa sigui inverti den proyectonan pa mehora e producto y asina eleva e experiencia di e bishitantenan sin lubida ariba nos localnan. Minister Dangui Oduber a traha hopi duro hunto cu ATA, APA, AAA y demas partnernan den turismo manera ATSA, AHATA, Aruba Vacation Rental Association, ministerio di Turismo, y departamentonan di Gobierno.
No por keda sin yama un danki especial na e empleadonan di hotel, taxistanan, tour operators, sector di F&B y tur personanan cu ta traha den e sector di hospitalidad pa hunto asina logra record nobo di cifranan di turismo pa aña 2023.
