Frans Ponson di CUA:
ORANJESTAD (AAN): Presidente di Comerciantenan Uni Aruba (CUA), Frans Ponson, ta cuestiona e trato desigual entre comerciante cu ta cumpli cu su obligacionnan fiscal y esnan cu durante añanan no a paga nan impuesto.
Ponson ta indica cu comerciantenan formal ta paga nan impuesto na tempo, entrega nan documentonan y haci sacrificio financiero pa mantene nan negoshi na ordo. Sinembargo, ora un persona acumula atraso fiscal, e por termina ta haya oportunidad pa negocia un areglo, descuento of condicion mas favorabel.
Segun CUA, esaki ta manda un señal preocupante: esun cu ta cumpli ta paga e totalidad di su obligacion, mientras cu esun cu no a cumpli por eventualmente haya un “miho deal”.
Ponson ta enfatisa cu CUA no ta contra solucion pa empresario cu sinceramente a enfrenta dificultad financiero. Sinembargo, mester tin un diferencia cla entre un negoshi cu no por a paga door di circunstancia real y un persona cu deliberadamente no a cumpli mientras e ta competi cu comerciante formal.
“Si Gobierno kier cambia mentalidad, e no por recompensa solamente falta di cumplimento. E comerciante cu tur aña ta paga na tempo tambe merece reconocemento,” Ponson a declara.
Segun Ponson, falta di maneho durante hopi aña a causa e situacion aki. Gobiernonan y ministernan cada biaha kier bin cu leynan nobo, specialmente pa despues gaba ta ken a bin cu e ley y tambe pa haya voto. Sinembargo segun Ponson, si gobiernonan stop di bin cu ley nobo y drecha y reenforsa e maneho di loke ya ta existi, lo tin un miho Aruba.
Ponson ta enfatisa cu esaki ta un preocupacion di comerciantenan cu ta duna placa na Gobierno. Y tur hende ta duna placa pa haya algo bek. Y no di Gobierno precisamente. Si tur hende cumpli y paga, impuesto ta baha pa tur. Sinembargo, Ponson a sigura, apesar di ta pagando, no ta mira cambio.
Segun e, si no drecha e mentalidad, y no duna comerciantenan un miho percepcion, e situacion ta bira pio, y segun e, e mercado ilegal lo crece mas ainda.
