Prome Minister Evelyn Wever-Croes:
ORANJESTAD (AAN): Diaranson 16 di November, un dia historico pa nos pais pa loke ta trata presupuesto di nos pais, un presupuesto historico den tur sentido. Parlamento a aproba e Presupuesto 2023 cu tin un surplus di 63 miyon florin.
Prome Minister Evelyn Wever-Croes personalmente ta considera esaki hopi particular pasobra e ta refleha e compromiso di Gabinete Wever-Croes desde cu a cuminsa goberna na 2017. E meta desde e prome dia tawata pa soluciona e problemanan financiero di nos pais. “Nos a traha hopi duro pa logra”.
Prome Minister a duna di conoce cu na 2018, a cera e deficit cu Gobierno a hereda. Na 2019, a cera e presupuesto cu un surplus di 4 miyon florin. Den e mesun tempo den Parlamento, Gobierno a anuncia cu na 2020 lo tin un surplus di 40 miyon florin pa cua motibo Gobierno tawata hopi orguyoso. Sinembargo, manera Aruba henter sa, e pandemia a causa daño y cambionan drastico. Resultado di esaki ta cu Aruba a conoce un deficit di 1028 miyon florin.
“Awe, Parlamento a aproba un presupuesto pa asina 2023 Aruba tin un surplus di 63 miyon florin. Esaki ta algo hopi grandi pa Gobierno y sigur pa nos pais”, Prome Minister a remarca.
Prome Minister a pone enfasis riba e importancia di tin un surplus den un presupuesto. Cu un surplus, Gobierno ta haya e espacio pa inverti den nos pais, entre otro den enseñansa, den cuido, den cuido di nos grandinan, den siguridad di nos pais, den infrastructura.
“Mi ta gradici tur esnan cu a sostene e presupuesto. Mi ta gradici Parlamento cu a duna nos e aprobacion na e presupuesto. Y mi ta gradici e pueblo di Aruba. Dios tin plannan grandi pa Aruba. Nos mester tin fe, determinacion y sigui traha duro”, Prome Minister a expresa.
