ORANJESTAD (AAN) – E aña aki por a mira hopi entusiasmo den e comunidad, pa cu celebracion di Dia di Himno y Bandera.
Un cantidad grandi di ciudadanonan tabata presente for di trempan, wardando momento cu e ceremonia protocolar y cultural cuminza. Hopi hende a aglomera riba Plaza Betico Croes, na ki lugar cu por a haya un sombra, sea para of sinta abao, por a mira un ambiente di completo felicidad. Tambe na e otro banda di caminda un cantidad grandi di persona a para wak e desfilenan pasa, y hopi aplauso caluroso a wordo brinda.
Un bunita acto cultural prome y despues cu Minister Presidente a duna su discurso, unda el a enfoca riba e prome dia cu e bandera di Aruba a wordo hisa na Aruba, y cu su persona tabata un mucha di scol basico, e mesun scol cu su primo Glenbert Croes a atende, y cu nan a sinti un emocion inmenso cu e cabesante di nan scol a laga nan ta presente den e acto maraviyoso y civico aki, cu otro scolnan no por a experiencia pasobra e tempo ey actonan asina tabata prohibi. Asina por a compronde di nos prome minister, cu a acentua cu e mesun emocion di e dia memorable ey, e ta sintie cada aña y sigur e aña aki, despues di dos aña consecutivo cu no por a celebra debi na e pandemia. Por cierto un bunita y interesante discurso cu Prome Minister a pronuncia.
E Himno Nacional a wordo interpreta pa e tramendo coro di Cacique Macuarima Scol, y tambe a hala hopi atencion e cantica ganador den categoria infantil di “Un canto pa Aruba su Himno y Bandera” titula Ken ta Arubiano. Hopi sentimento e hobencito a pone na su interpretacion, y ki bunita cu e cantica ta concientiza un y tanto e yiunan di tera naci na Aruba y cu ta stima nan pais ta Arubiano, pero tambe esnan cu a scoge e Isla aki pa biba y cu ta mustra cu ta stime di curazon, ta Arubiano.
Y no por keda sin menciona e ganador di Poeta di Patria, Marilis Becker, cu a titula su poesia “Pieza di encanto” declama na un manera sublime.
Hopi bon organiza tabata e marchanan di e diferente gruponan manera Scol pa Polis, Scoutnan, Unidad di Bombero, etc. Pues, Aruba su Dia di Himno y Bandera a wordo honra cu hopi dignidad, gracia, beyesa y specialmente cu Hopi Curazon. Pabien Aruba!
{gallery}Cu un precioso celebracion di Dia di Himno y Bandera, Aruba a wordo honra{/gallery}
