ORANJESTAD (AAN) — Prome Minister Evelyn Wever-Croes, a sigui relata den Parlamento, relaciona cu e Rapport Forensico di RdA,
cu e reunionnan cu tabata tuma lugar di Hunta di Comisario (2016-2017), y cu nan tabata purba di tine secreto, hopi biaha tabata wordo asisti pa un consultant di exterior, cu tabata esun encarga di haci e notulenan, de vez en cuando.
E mandatario a subraya cu scondemento di e documento concerni a haci hopi fastioso pa haya un miho bista, pero si por a mira specialmente den e parti di I.T, cu den e hart drive cu nan a haya, di e directornan di e compania, mas documento cu tabata tin “Bijzondere aandeelhoudersvergadering” cu ta reunionnan di accionista, pues di gobierno, cu no ta e regularnan; nan ta e bijzonderenan, y den nan por mira cu Mike de Meza ta esun cu ta na cabes di nan, unda cu tabata tin tambe director, ademas Luciano Milliard, Franklin Hoevertsz, Nathalie de Vos cu nan nomber ta bin varios biaha.
Den e analisis di gasto cu tabata tin, Prome Minister a splica cu segun e statutonan e Directie di RDA, prome cu haci un gasto, un pago of un compromiso financiero cu ta surpass 100 mil florin, e mester a haya e aprobacion aki por escrito, adelanta, di e Raad van Commissaries; y tambe, si ta trata di un compromiso financiero cu ta mas di un aña.
“Pues, esaki ta dos exigencia cu ta poni den statuto, cu ta masha regular, masha normal, pero nos ta mira den e investigacion, con practicamente nunca tabata pidi e permiso, ni tampoco tabata duna e permiso. Anto akinan bo ta mira cu tanto e Directie como e Hunta di Comisario a faya. “Hasta tabata tin algun pago di 99.999,= florin, hustamente pa no cay bao di e 100.000,= pa no tin nodi di puntra ni haya e aprobacion”, Prome Minister a relata.
E dignatario a sigui splica cu ora cu den un administracion tin asina tanto biaha cu a paga hende pa propaganda, pa branding, pa 99.999,= florin, esey so caba ta un alerta cu mester investiga kico ta locual a pasa eynan. “Akinan ta e caminda cu cos a bay fout” Minister Presidente a subraya.
El a para keto tambe na e cuenta di banco, kendenan tabata autoriza pa firma pa e compania aki.
“Djis un ehemplo, pasobra full e rapport no por pasa den dje aworaki. Ken por a firma riba e cuenta aki? E Compania a wordo lanta na September 2016. Na e momento ey, e director logicamente por firma. Pero tambe, diripiente Richard Arends por a firma riba e cuenta di un compania. Na e momento ey e tabata consehero di Minister di Energia. Ami tin consehero, pero ni un tin autoridad pa firma, riba ni un cuenta, ni di gobierno ni tampoco ningun compania estatal. Bo no ta haci esey! Bo no ta mezcla, ora bo tin un consehero anto bo ta hinke cu un autoridad pa firma den un compania, esey ta contra reglanan di bon gobernacion, Esaki pa cuminza. Mike de Meza himself tabata tin autoridad pa firma. Mi kiermen, con mas bo por viola e reglanan di bon gobernacion? E tabata e Minister, anto como Minister bo ta lanta un compania estatal? Bo ta haya hopi miyones di Valero di su settlement te ora el a bay, anto minister ta esun cu por firma. Pakico bo a lanta un compania anto? Miho bo a hacie un compania di gobierno unda bo tin tur autoridad”, Minister Presidente a declara y a señala cu ta conflicto di interes di Mike de Meza, tabata tin den tur esaki.
