ORANJESTAD (AAN) – Ronald van Trigt, a wordo nombra como Presidente di e Comision cu a guia un rapport,
cu a wordo institui door di Minister di Salud, Dangui Oduber, na luna di Februari di e aña aki, cu yama “Nationale Commissie Kosten Besparing voor de Medische Zorg”.
Van Trigt a duna di conoce cu e rapport aki a wordo entrega Diaranzon, na Minister Dangui Oduber, y pa e motibo aki e Comision a haya prudente pa duna cuenta na prensa, riba e proceso cu esaki a cana y kico tur a wordo haci den dicho proceso.
El a splica cu e Comision aki a wordo institui, despues cu na Mei aña pasa, e negociacionnan cu Hulanda a cuminza, pa e sosten financiero cu Aruba tabata tin mester, pa motibo di Covid-19 y tur su consecuencianan.
Van Trigt a bisa cu, manera ta conoci, Conseho di Minister di Reino a dicidi pa bin cu algun condicion, pa e pagonan periodico cu Aruba mester ricibi.
“Un di e condicionnan ey ta cu Aruba mester bay reduci su gastonan den salud, cu un cierto suma. Esaki ta algo cu, naturalmente, a crea un confusion y den un carta di 8 di Mei, CAft a bisa cu e ta bay ta un reduccion di 5 miyon cu ta necesario pa e tranche di Juli 2020. Pero dia 15 di Mei, Conseho di Minister di Reino, pa medio di Secretario di Estado Knops, a cambia locual ta e exigencia aki, pa un exigencia di 5 miyon florin pa luna, cu mester a wordo acepta pa e tranche di Juli. Ta dificil pa nos bay motiva e decision aki, cu Conseho di Minister di Reino, pero si nos mester papia di e consecuencianan di e decision aki y e motibo pakico nos ta para aki, awe”, Ronald van Trigt a señala.
El a sigui splica cu Conseho di Minister di Reino, a duna un condicion specificamente na AZV, pues no a wordo laga habri con esaki ta bay wordo deduci.
“Pero tabata na AZV, na e momento ey, cu nan a haya di Minister, consecuente di e condicion aki, e mandato pa corta, proporcionalmente, 5 miyon florin pa luna, for di e presupuesto di AZV”, van Trigt a menciona.
El a agrega cu for di e prome instante, ora esaki a tuma lugar, e sector salud ya caba, pa medio di un carta oficial na Juli 2020, a informa e gobierno y parlamento, y por pensa cu tambe Hulanda, cu e consecuencianan di e 5 miyon aki, lo no ta sostenible riba corto plazo, pa e salud na Aruba.
Esaki a causa cu e 5.5% di e cortamento cu AZV a implementa, basa riba un proceso cu nan a sigui, a cuminza corta structuralmente den nan presupuesto mensual pa cuido medico. Esaki a continua te cu Januari 2021, despues cu sumanan cuantioso a wordo corta for di e base di zorg. Nan a dicidi pa manda un otro carta na Januari, cu a bisa cu, “cu e condicion nos no por mas”, y cu no por wanta e reduccion di 5.5% mensual aki mas, pasobra e ta pone cu AZV no por garantiza e cuido cu pais Aruba mester di dje.
Den otro articulo, DIARIO ta sigui elabora riba e declaracion di Ronald Van Trigt.
