Minister Ursell Arends:
ORANJESTAD (AAN) – Minister Ursell Arends, den entrevista cu DIARIO a menciona, cu otro keho cu su ministerio ta ricibi for di comunidad, ta tocante e incinerator.
E dignatario a menciona cu nan a bay Hues pa pidi autorizacion pa e incinerator por opera bek, y asina por procesa slosh mirando cu e problematica aki no tin ningun otro manera sostenible pa wordo procesa, na e momentonan aki.
“Un bes cu Hues a duna nos e ‘green line’ nos tin cu a cumpli cu varios rekisito y nos a cuminza procesa slosh bek y esaki tambe, kizas, ta un molester pa e bario, mirando cu desde November aña pasa e no tabata den funcion; pero aworaki e ta den funcion bek, semper y cuando nos percura pa e operacion aki cana segun loke regla y ley ta prescribi, e no mester ta un impacto negativo pa e medio ambiente y sigur no pa e salud di e habitantenan di e area rond di e dump di Parkietenbos”, Minister Ursell Arends a señala.
Encuanto e tema di e compania priva, esaki tambe ta wordo monitorea regularmente y na e momentonan aki a instala “Air quality sensors” conhuntamente cu Metabolic Foundation, na cuater area. “Asina aki nos por midi, constantemente, e calidad di aire y esaki tambe ta wordo haci publico, cu tur hende por wak cu nos ta haciendo nos tarea p’asina aki garantiza cu no tin ningun impacto negativo riba nos medio ambiente”, e Minister Ursell Arends a menciona.
