Minister Gerlien Croes ta lamenta:
ORANJESTAD (AAN)-- Minister Gerlien Croes a expresa, tocante e proyecto di renovacion di Stadion Guillermo Trinidad, cu ta duel’e hopi, con inversion a wordo haci na e forma cu a tuma lugar aki, pasobra un proyecto asina mester tabata tin planificacion y un destaho publico, den cual lo a hinca henter e proyecto den man di un compania, cu mester a wordo poni responsabel, pa tur e trabaonan, y cu gobierno tin garantia tambe.
Segun e dignatario, locual a sosode cu e proyecto aki ta cu e minister anterior, directamente, tabata facilita diferente compania pa cada un haci un pida di un trabao, y na final di dia esaki a trece dolor di cabes pasobra bo no tin overdraft, tampoco garantia di tur e trabao, y no por pone e contratistanan responsabel, pasobra un mandato nan a haya.
E mandatario a pidi Lotto pa haci un calculacion completo p’e di kico tur a wordo gasta durante e ultimo dos añanan, awo cu e raad nobo tey, of e tres representantenan di gobierno cu tin den e directiva. E ta spera cu esaki tuma lugar lihe, pasobra calculacion di e director actual cu ta director saliente tambe, ta bisa cu ta rond di siete miyon, e ta kere, sin conta e 1.5 miyon cu gobierno a pone; pues, ta 8.5 miyon na un proyecto cu no ta cla, e dignatario a señala.
El a agrega cu ta duel’e hopi, alavez, cu e ta haya diferente señalnan cu federacionnan cu ta haci uso di e facilidad tin biaha tin keho, cosnan ta wordo bisa. E mandatario a expresa cu e por a scoge pa tene e lugar cera tambe. “Mi por a bisa, bo sa, mientras cu e lugar aki no ta cla ningun hende por haci uso di dje! Pero pa cooperacion y continuacion di deporte, mi a bisa ‘boso por haci uso di dje teniendo na cuenta cu
Cu nos tur mester yuda otro den esaki. Berdad e lugar aki ta di Land, pero na momento aki mi no ta cobra huur na ningun federacion. Nan ta haci uso por nada, di e lugar”, Minister Gerlien Croes a señala.
