ORANJESTAD (AAN) – E Relacionista Publico di Departamento di Salubridad, Jurette Croes, tambe a dirigi palabra durante e conferencia di prensa, pa clausura e Vacunathon
cu a tuma lugar diasabra 24 y diadomingo 25 di April awo.
Jurette Croes a trece dilanti cu sumando e 7.001 persona cu a vacuna den e dos dianan aki, Aruba tin 53.013 ciudadano vacuna caba, cu ta representa 54% di e grupo di riesgo. “Sigur un bunita cifra cu nos ta caminda di unda nos kier yega. Pero esaki no ta nifica cu e virus a stop di existi na Aruba pero sigur e ta nifica cu e riesgo ta bahando y esnan cu a vacuna, si nan bin den contacto cu e virus mes, nan no ta bay bira asina malo y presenta complicacionnan pa yega te Hospital y despues fayece”, Jurette Croes a subraya.
Croes a gradici e 7001 persona cu a acudi na vacuna e dos dianan aki y sigur personanan cu den e lunanan cu a pasa no a logra di yega na e lugarnan di vacunacion pero cu a haci uso di e oportunidad aki, y esey tabata e intencion. Tambe el a yama danki na e 200 empleado di gobierno, cu tabata riba pia trahando e dos dianan aki, entre otro trahadornan di gobierno, hopi boluntario di AZV, Wit Gele Kruis, specialistanan cu ta cu pension caba y presenta pa yuda, docternan di cas cu a colabora boluntariamente. Pues Jurette Croes a extende un danki di curazon na tur esnan cu ta yudando Aruba den su proceso di recuperacion.
E dama a duna di conoce cu esnan cu a vacuna Diasabra 24 cu tabata pa prome bez, e di dos dosis lo ta dia 22 di Mei, y esnan cu a vacuna Diadomingo 25, nan di dos vacuna ta dia 23 di Mei.
Awe, dialuna 16 ta habri te cu merdia pero pa esnan cu tin cita pa e di dos vacuna, y Diamars tur e localidadnan ta cera. Diaranzon e localidadnan di Santa Cruz y Teresita Center ta habri atrobe pa esnan cu ainda no a haya nan prome vacuna “walk in”. Finalmente, Jurette Croes, PR di DVG a gradici e restaurantnan fast food cu a yuda cu nan productonan pa e trahadornan den e cuater localidadnan di vacunacion. Tambe el a haya danki na e comunidad cu a forma parti di e solucion.
