Eduard Pieters di PPA ta felicita y recorda:
ORANJESTAD (AA) -- Diaranson 21 di Mei, Fraccion di PPA a recorda cu Aruba su papiamento ta cumpli 22 aña cu a keda oficialisa. Esaki tabata un momento grandi pa Aruba. For di 2003 papiamento hunto cu Hulandes ta e dos idiomanan oficial di Pais Aruba. E tempo ey den parlamento Aruba a pasa un ordenansa caminda cu awe ya caba 22 aña pasa ta recorda cu a oficialisa papiamento hunto cu Hulandes. Esaki ta significa cu na Aruba banda di cartanan haci na Hulandes, awendia, despues di 2003 e carta por ta na papiamento tambe.
“Esaki tin cambionan cu por ta hopi hende no sa, pero desde 2003, Gobierno di Aruba a wordo autoriza pa por saca su comunicado y cartanan na Papiamento. Pues, banda di cu antes di 2003 e deber tabata sak’e na Hulandes, awendia, despues di 2023 por sak’e na Papiamento tambe. Y, e ordenanza aki tambe por duna espacio na Arubianonan, na hende cu ta papia Papiamento, cu ta mayoria di nos na Aruba, por manda carta tame, corespondencia, na gobierno di Aruba, na Papiamento. Esaki ta un logro cu nos mester celebra y tur aña mester corda di nobo, cu Papiamento a wordo oficializa, y esaki tin un impacto grandi. Si gobierno saca un carta na Hulandes y nenga traduci esaki na Papiamento, pa e Comunidad di Aruba, semper e ciudadano por acudi na LAR pa obliga gobierno pa traduci esaki na Papiamento”, Eduard Pieters di PPA ta señala.
E ta subraya cu hopi importante ta, pa nos balora nos idioma. P’e ley aki, 22 aña pasa, un dia manera awe, e Arubiano, e personanan Arubiano nobo, cu ta balora y stima Papiamento, tin un instrumento extra pa defende nan mes como ciudadano y cu por hiba Papiamento padilanti.
“Sinembargo, riba e mesun ley aki, nos ta ripara den articulo 5, te ainda pa loke ta parti di ley, pues wetgeving mester ta na Hulandes. Pues, den futuro, no mucho leu nos mester traha duro riba esaki, pa cambia pa nos por tin leynan tambe na Papiamento, cu nan ta respeta Papiamento tambe den e parti Legislativo. Dus nos tin un caminda pa cana; desde 2003 te aworaki, nos a yega hopi leu, y nos por bay hopi mas den historia, e lucha di tanto aña cu Papiamento tabata tin pa haya su Status. Nos tur mester ta orguyoso di nos idioma papiamento!” Pieters, a enfatiza.
