Debi na Potencial Depresion Tropical 13...
ORANJESTAD (AAN): E barco di Royal Caribbean International, esta ‘Explorer of the Seas’ a sali Diasabra atardi 4’or di Port of Miami pa un viahe di 8 dia den Zuid di Caribe.
E barco a bishita Bonaire riba Diamars, unda el a keda mara na waf di 8’or di mainta te cu 6’or di atardi. Diaranson el a bishita Curaçao for di 8’or di mainta te cu 8’or di anochi.
Fotografo di DIARIO a saca potret ora cu Diahuebs pa 7’or di mainta, el a drenta den Waf di Aruba. Su schedule normal ta pa keda mara na Oranjestad te 8:00 pm.
Sinembargo, ya pa 5:04 pm e barco a bandona Aruba, y mesora a dal un buelta pa pasa west di Aruba, pa asina regresa Miami.
E tres ora di acelera e schedule aki, ta pa purba na evita di ta bay sali ora cu e Potencial Depresion Tropical 13 ta demasiado cerca di e isla, y asina evita cu e barco lo haya lama mas bruto ora di move pa Merca. E lo drenta Port of Miami riba Diadomingo pa 5:00 am.
Y e tabata moviendo bayendo pabao di Aruba cu velocidad di 17 nudo, pa gana e ‘careda’ contra e mal tempo.
Pa e fin di siman aki no tin ningun barco crusero planea pa bishita Aruba.
