Parlamentario Eduard Pieters (PPA):
ORANJESTAD (AAN): Den e ultimo dianan, un inkietud serio ta birando cada bes mas evidente den nos comunidad: e servicionan di gobierno, particularmente na Censo, no ta funcionando manera cu pueblo di Aruba merece. Parlamentario Eduard Pieters di fraccion di PPA ta expresa su preocupacion riba e situacion aki, calificando esaki como inaceptabel den un pais moderno, cu kier posiciona su mes como uno eficiente y digital.
“No tin cita”: Un sistema cu a colapsa
Fraccion di PPA ta ricibi diariamente kehonan di ciudadano, cu ta purba registra na Censo, pero no ta logrando. E hendenan cu a cumpli cu tur rekesito legal, cu a paga pa nan permiso di estadia y trabou y cu mester inscribi pa haya acceso na AZV (seguro medico), ta topa cu un sistema digital, cu for di januari 2026, cu simplemente ta bisa: no tin cita disponibel. Segun Pieters, situacion aki ta mas cu un inconveniente tecnico.
“Nos a ricibi screenshot unda e sistema di Censo ta mustra claramente cu ningun usuario no por haci uzo di e sistema. Esaki ta un blokeo total di servicio publico,” Pieters a expresa.
Den un era digital, caminda gobierno ta papia di modernisacion y eficiencia, e realidad pa hopi ciudadano ta completamente diferente: un sistema cu no ta responde y un servicio cu no ta accesibel.
Ciudadano sin seguro: Un riesgo real
E impacto di e fayo aki ta hopi mas grave cu loke ta parce na prome bista. E hendenan cu no por inscribi na Censo no por activa nan registro oficial y consecuentemente, no por haya acceso na seguro medico di AZV. “Si algo pasa cu e hendenan aki, ken ta asumi responsabilidad?” Pieters a cuestiona. Esaki no ta solamente un problema administrativo. Ta un problema cu ta mishi directamente cu salud, siguridad y dignidad humano.
No solamente stranhero: Arubianonan tambe ta afecta
E situacion aki no ta limita solamente na persona cu permiso di estadia, sino tambe e Arubianonan cu ta bin bek Aruba, of e hobennan cu kier regresa pa continua nan estudio.
Nan no por inscribi, nan no por regula nan situacion y nan ta keda exclui for di un sistema cu mester sirbi nan. “Nos no por tin un sistema cu ta tranca su propio pueblo for di acceso na servicio basico,” Pieters a indica.
Un falta di coordinacion entre e ministerionan
Segun analisis di PPA, e situacion actual ta un resultado di un problema mas profundo: falta di coordinacion entre e ministerionan, particularmente entre Ministerio di Husticia y Ministerio di Asuntonan General. Crecemento den aplicacion pa permiso di estadia y trabou no ta compaña pa capacidad operativo na Censo. Resultado: un sistema cu ta overload y incapaz pa atende demanda. “Esaki ta un ehempel cla di falta di planificacion, falta di vision gubernamental y falta di liderazgo efectivo” Pieters a declara.
Pueblo no mester paga pa mal maneho
Fraccion di PPA ta enfatisa cu niun ciudadano mester paga e consecuencia di ineficiencia gubernamental. Hendenan a cumpli cu ley, nan a paga y nan a sigui procedimento, sinembargo nan no ta haya servicio. “Pueblo di Aruba merece un servicio di 5 strea,” Pieters a enfatisa. “Y no un sistema cu ta faya nan den momento cu nan mas mester.”
Respet pa nos profesionalnan
Pieters tambe a reconoce cu e liderazgo tecnico dentro di Censo tin reputacion di profesionalismo y dedicacion. “Mi ta convenci cu e directora ta un hende hopi competente y profesional. Pero esaki ta mustra cu e problema ta bin di mas halto, kisas na nivel di gobernacion y coordinacion politico,” Pieters a señala.
Fraccion di PPA ta haci un yamada urgente na Gobierno pa actua rapido: restablece e sistema di cita na Censo, garantisa acceso inmediato pa inscripcion, proteha derecho di ciudadano na AZV y fortalece coordinacion entre e ministerionan. Solucion concreto mester bin dentro di un siman. Situacion aki ta un test real pa gobernacion serio. Gobernacion no ta discurso bunita so of biahamento rond di mundo of saca potret pa show, sino gobernacion ta servicio y responsabilidad. Ora sistema faya, pueblo no mester paga e prijs.
