ORANJESTAD (AAN): CreActivo 2024 ta e prome conferencia creativo cu ta wordo organisa na Aruba pa asina cende e chispa di colaboracion y innovacion den industria creativo y cultural.
E conferencia aki ta duna un oportunidad unico na nos artistanan, creativo, visionarionan y innovador pa uni hunto y conecta den e mundo di creatividad y cultura. Si bo ta interesa marca bo calendar pa dianan 8 y 9 di october, caminda Renaissance Convention Center lo wordo transforma den un centro di inspiracion, conexion y energia creativo.
Kico ta CreActivo? E ta mas cu solamente un conferencia; CreActivo 2024 ta un celebracion di e poder di creatividad y cultura. E conferencia aki ta dedica specialmente pa uni nos artistanan y creatives di Aruba y tambe rond di mundo, ofreciendo un plataforma unda ideanan y colaboracion por florece. Durante dos dia inspirativo lo brinda un atmosfera unda creatividad no tin limite. Comparti cu oradornan cu ta stimula bo mente, tuma parti den actividad dinamico y uni na discusionnan cu ta desafia e status quo.
Esaki ta bo oportunidad pa conecta y network, expande bo horizonte creativo y contribui na e formacion di e futuro di nos industria cultural y creativo. No ta importa si bo ta un artista estableci, un creador aspira of simplemente cu bo ta pasiona pa arte, CreActivo 2024 ta invita abo pa forma parti di e movement aki cu lo redefini e futuro di nos industria creativo y cultural.
Dianan 8 y 9 di october lo wordo recorda como e punto di cambio den e paisahe creativo y cultural di Aruba. Tickets pa CreActivo 2024 lo ta disponibel pronto.
