Na 2023 mundo a habri tur porta crucial pa confrontacion y guera
- Produccion economico internacional ta preveni guera mundial?
- 2024 lo exigi negoshi mundial enorme pa futuro sin petroleo
ORANJESTAD (AAN) Si mester uni e ingredientenan pa un guera mundial cu lo destrui tur loke hende a alcansa den epoca moderno, ta yega na e descripcion perfecto di situacionnan mundial actual.
Faltando dos siman pa mundo bandona 2023, mundo ta un escenario di violencia explosivo. Casi por conclui cu si no tabata pasobra hende a cansa di e palabranan “Guera Mundial”, cu lo a yega na e conclusion cu ya e portanan di un guera mundial a habri.
Sinembargo, tin un factor cu ta resalta y sigur a bini dilanti durante ultimo siman. Ora a pensa cu e diferencia di interes di paisnan economicamente poderoso lo a haci un acuerdo riba futuro di petroleo imposibel, a nace uno di e acuerdonan mas historico cu ta e cooperacion mundial pa despedi di petroleo.
DIARIO, hunto cu su expertonan durante ultimo dianan a conclui, cu e informacionnan cu a nace na Dubai y despues na tur pais cu a participa, ta splica mundo cu economia mundial lo conoce un periodo di inversionnan enorme, pa asina transforma e base economico actual den e base economico di futuro.
Na final di 2023, mundo tin e aparencia di e situacion prome cu Segundo Guera Mundial, cu den un situacion di horor, a conduci na un Epoca di Oro debi na e forma cu placa mester a lora, pa por a crea un economia mundial nobo.
E economia mundial cu mundo a crea despues di Segundo Guera Mundial, cu tabata basa riba petroleo, for di basta tempo ta na discusion pasobra e tabata pone clima na peliger.
Na mes momento, mundo a drenta uno di su epocanan den cual progreso cientifico, a hiba hende riba e caminda di Inteligencia Artificial cu ta hiba hende na un epoca di industrialisacion y convivencia nobo.
Na hopi ocasion DIARIO a mustra cu mundo ta dilanti porta di e 2024, cu lo drenta historia como e pasashi pa cambionan radical riba diferente tereno.
Den e panorama cu a wordo presenta pa futuro di mundo, no por a tene na consideracion, cu un virus lo a presenta su mes y a haci necesario pa hende pone tur su conocemento na practica pa por a sobrebibi e calamidad cu a bira e pandemia, Covid-19.
Na e momento cu hende mester a bay guera contra Covid-19, e loke mas hende a preveni for di 1945 tabata, e creacion di situacion di un guera mundial nobo, a presenta su mes na mundo.
Manera DIARIO a informa su lectornan, hasta e expertonan monetario internacional, a mustra riba e problema serio pa recuperacion mundial den e ambiente di guera na sitionan peligroso pa paz mundial.
“Lo bini un guera mundial?” Un pregunta cu te na entrada di 2023 tabata parce un preocupacion, pero awor na porta di 2024, ta un realidad cu no por contesta cu “si”ni “no”.
Mundo ta na guera, pero oficialmente tin paz, mientras hende ta drenta un epoca nobo, den cual placa mester lora pasobra ta hopi placa mester pa tur e negoshinan cu mester habri nan porta pa reemplasa petroleo y tur e cambionan cu Inteligencia Artificial lo introduci.
E forma cu mundo ta trata na conecta, sigur ta bini dilanti den e acuerdo cu a logra pa e periodo cu ta bira lomba pa petroleo, cu lo wordo reemplasa a base di inversionnan enorme, cantidad di negoshi nobo rond mundo pa luz por cende den cas, pa hende por transporta su mes y pa mundo por sigui su rumbo pa futuro.
Ora mira atras riba 2023, e sonido di guera ta resona. Un guera cu por causa horor na mundo, cu ta un arena enorme di violencia y agresion.
2023 lo entrega mundo un Guera Mundial na un momento crucial pa economia mundial? Of e necesidad y posibilidadnan enorme pa negoshi internacional, lo crea formula pa cooperacion economico carga cooperacion riba otro tereno?
Cu entrada di 2024, un pasado den cual Covid-19 a basha economia mundial abou, ta topa cu un futuro den cual inversionnan enorme lo pone placa lora den e salida di petroleo y tur loke ta funciona a base di petroleo.
Inteligencia artificial lo ta basico den e calculacionnan y planificacion cu mester tuma lugar rond mundo, den cual guera y conflicto ta causa amargura, pero den cual tur e partidonan cu ta enfrenta otro, mester uni.
Esaki no ta un soño pero e realidad cu sigur a bini dilanti durante 2023, cu ta papia di unionnan comercial entre paisnan cu ta pilar economico di mundo pero enemigo den bista di publico mundial, cu na fin di 2023, ta sclama pa un gota di paz mundial!
