*Rema hunto ta un comunidad full vacuna!
ORANJESTAD (AAN) – E contagio di Covid-19 cu e dominio di su variante Delta, ta pone pueblo di Aruba den un situacion hopi critico. Den e relato di DVG di Diadomingo ultimo, nan ta bisa cu den e ultimo 30 dianan a fayece 10 ciudadano, di cual 2 tabata tin vacuna y 8 no tabata vacuna.
No ta specifica si e dos vacunadonan tabata tin un of tur dos dosis, pero riba su mes ta hopi preocupante, mirando cu tur cu ta traha den e veld ta aconseha hende pa vacuna, precisamente pa si acaso haya e virus e sintomanan keda leve, y si drenta hospital no bay den ICU, y evita fayece.
Na e momento aki segun e epidemiologo di DVG a informa recientemente, e Delta ta dominante y Aruba su casonan ta casi na 100% variante Delta. Si por a compronde bon cu dos dosis di e vacuna e proteccion ta 70%, kiermen ta keda un 30% di no inmunidad, den casonan di hendenan di riesgo cu por haya complicacion.
E situacion ta temeroso sigur, y sin duda ta urgi pa mayoria di e hendenan cu no a vacuna pasobra nan tin desconfianza den e vacuna, pone riba balansa si nan kier conta cu un porcentahe di proteccion halto of un tiki menos halto of ta completamente desproteha, cu mas riesgo si wordo contagia di bira hopi malo of hasta fayece. Mester tene cuenta tambe cu e hecho cu si bo a haya ambos dosis di e vacuna, asina mes nos mester sigui cuida nos mes!
Un bez mas por ripara cuanto hende tin miedo, incluso panico di e virus pero di otro banda ta scucha kico cierto personanan ta papia, incluyendo un medio di prensa cu tur dia ta suta cu informacion contra e vacuna Pfizer, considera esun di mas efectivo, y ta bin cu yen di storia cientifico ficticio, pa descurasha esnan cu no a vacuna ainda, pa hacie! Segun e medio nan ta respeta opinion di tur hende, pero ta hinca palo bao candela pa hende no sigui vacuna! Na unda e respet pa opinion di otro ta keda anto? No ta aremetiendo contra e vacuna respet ta wordo mustra, pero si ta haci daño na e mentenan di esnan cu ta scucha su mensahe y kier a tuma e vacunanan pero ta opta pa no vacuna. Ta ken ta gana kico?
Covid 19 a bira manera un boto cu nos tur mester cu rema hunto pa e no hundi, y caba cu nos comunidad. Y rema hunto kiermen: vacuna! Asina senciyo!
