Medidanan corecto a reduci peliger na Aruba considerablemente
*Paisnan grandi ta lucha contra tercer ola y ta teme pa nan futuro
*Plan di vacunacion e aliado grandi di Aruba contra enemigo invisibel
ORANJESTAD (AAN) — E cantidad di casonan di Covid-19 na Aruba ta baha. Mientras e cantidad di persona infecta cu e malesa ta baha na Aruba, e pregunta ta surgi cerca hopi hende, cuanto tempo mas mester sigui cu medidanan.
E pregunta aki no por wordo contesta na ningun pais na mundo, aunke tin un tendencia pa cual gobiernonan rond mundo y autoridad internacional riba tereno medico ta adverti.
Ya ta basta tempo cu rond mundo hende ta biba den un situacion diferente for di loke tabata normal te na 2020 ora e coronavirus a presenta.
Cantidad di hende a cansa pero e malesa si no a cansa y mas cu nunca ta un peliger mundial.
Aruba tin privilegio grandi compara cu hopi pais na mundo. Na prome luga Aruba por cera su porta y asina evita cu e virus ta drenta. Na un continente esaki ta mas dificil.
Na segundo luga y mas importante, Gobierno di Aruba y tur instancia envolvi, a percura di atende cu e malesa na e miho forma.
Prome cu Aruba tabata completamente ekipa pa por a confronta e atake formal, medidanan di distancia social, toque de queda y tur loke tabata necesario pa Aruba a preveni morto y cantidad di hende cu lo sigui biba cu e resultadonan di e enfermedad, a wordo tuma.
Aruba a deshaci di su economia pa scapa bida, manera a pasa na casi tur pais civilisa.
Esaki ta cuadra completamente cu constitucion di paisnan democratico, cu ta permiti Gobierno tuma tur medida pa asina evita morto sin necesidad.
Pa por comprende e medidanan cu Gobierno mester a tuma, mester mira regla di trafico, cu entre otro ta prohibi hende pasa den luz cora of crea cualkier situacion di peligro den trafico.
Autoridad y gobernacion na tur pais democratico tin como base pa proteha e ciudadano na tur momento y den tur situacion y esaki por a mira sigur na Aruba, caminda tur medida di prevencion a wordo introduci segun e emergencia mundial di Covid-19.
Na e momento aki mundialmente, gobernacionnan ta vigila e malesa cu ainda ta un peliger grandi. Tin pais cu no ta permiti ni nan propio ciudadanonan bolbe nan pais pasobra si nan tabata keda na un pais cu un porcentahe halto di caso di Covid-19.
Lockdown, toque de queda, schoolnan cera ta parti di e medidanan rond mundo pa scapa bida di hende, mientras e vacunacion di ciudadanonan ta tuma luga.
Aruba den esaki tambe a pone un ehempel y a haci uzo di e facilidadnan cu e pais tabata tin pa a haya vacuna for di Hulanda.
Un tremendo trabou a wordo haci dor di gobierno na Aruba cu den un tempo record a bini cu un plan di vacunacion cu manera tur experto na mundo ta indica, ta e unico forma pa confronta Covid-19.
Aruba, mescos cu henter mundo, mester sigui biba cu e realidad di e coronavirus cu ainda ta causa desaster na cantidad di pais.
Ciudadanonan mes mester yuda proteha nan bida y di otro. E sentido civico mester aporta na scapa bida di hende cu ta central den e sistema democratico.
Salud, bida y bienestar di hende ta e encargo mas grandi cu un comunidad y sigur gobierno tin.
Na Aruba e lucha contra Covid-19 ta esencial pa economia tambe pasobra mas hende vacuna tin na Aruba y menos grandi e peliger pa infeccion ta, mas por traha riba recuperacion di e pais, cu a conta cu un bon guia di gobernantenan y di tur instancia cu mester a yuda riba tereno medico pero tambe den mantencion di autoridad pa sigura bienestar di uno y tur.
