Sumanan enorme ta acompaña investigacion di ladronicia fondo publico --- Cifranan concreto mester expresa e daño financiero na pais y ciudadano --- Mester cobra criminal gasto enorme di investigacion di caso corupcion
ORANJESTAD (AAN)- Tin diferente forma cu un pais ta crea su entrada pa asina por funciona na interes di tur ciudadano.
Un pais tin propiedad cu mester wordo maneha a base di leynan cu mester cera porta pa abuso di propiedad nacional y benta di patrimonio di Pueblo. Pa medio di ley ta crea e facilidadnan, e personal y e reglanan pa atende cu propiedad di Pueblo.
Un investigacion di e sumanan cu ta wordo horta di e pais pa medio di corupcion y e gastonan enorme cu investigacion di casonan di corupcion ta trece cune, ta indica cu e realidad di corupcion mester wordo presenta na Pueblo pa medio di cifranan concreto cu ta papia un palabra mas cu cla.
Corupcion ta uno di e crimennan mas serio pero tambe mas perfecto cu comunidad conoce.
Corupcion ta usa metodonan bon calcula pa deshaci di ley y habri porta pa accionnan ilegal, contra ley, cu ta ta implica ladronicia di propiedad di e pais pa favorece uno of mas persona.
Pa un caso di corupcion por haya su inicio, e personanan envolvi mester ta bon na haltura di leynan, cu mester wordo kibra na forma scondi pa asina un grupo favorece su mes.
Negoshi ta wordo haci cu propiedad di e Pueblo y e pais, cu ta perde entrada importante si sigui reglanan pa transaccion cu propiedad nacional.
Ladronicia ta realidad den caso di corupcion, cu ta nifica e perdida di entrada di e pais pa medio di crimen, cu ta wordo bon studia.
Si den e acto di corupcion ya e pais y ciudadanonan a wordo perhudica, un etapa nobo ta manifesta su mes, na momento cu e caso di corupcion wordo descubri y investigacion mester cuminsa.
Un comunidad mester paga costonan enorme pa investigacion di un caso di corupcion.
Personal bon prepara y cualifica, a base di loke ley ta stipula, mester cuminsa busca prueba cu un crimen a tuma lugar y cu mester papia aki di un acto di corupcion.
Den e proceso aki, e persona cu posiblemente a comete un acto criminal, no por sufri ningun daño y cualkier eror cu wordo comete den investigacion, por wordo uza na fabor di e criminal y evita cu e ta wordo castiga.
E pais mester di personal capacita pa busca tur prueba pa por reconstrui e acto criminal dilanti Huez, caminda e caso di corupcion ta termina.
Gastonan enorme mester wordo haci den cada caso di investigacion di actonan di corupcion cu na Siglo 20 lamentablemente a destrui e imagen di Aruba.
Informantenan a indica na DIARIO cu e momento a yega pa traha y presenta na Pueblo di Aruba, un resumen di cuanto placa ta envolvi den casonan conoci di corupcion tanto pa loke ta trata placa cu e pais a perde na entrada pero tambe placa cu e pais mester paga pa investigacionnan di crimen.
Con placa di Aruba a wordo gasta? Rapportnan ta papia palabra cla con situacionnan cu ta parce aceptabel ta wordo crea, pa placa por alcansa hende y compania amigo.
Placa ta hunga e papel central den e recuperacion di Aruba, cu mester haya informacion concreto di loke corupcion a haci cu Aruba cu a wordo financieramente perhudica,
Informantenan di DIARIO ta di opinion cu mester introduci un sistema severo den cual e pais ta reclama pago di e placa cu el a perde den e transaccion a base di corupcion pero tambe pago di e gastonan cu e pais mester haci, pa por persigui accionnan di corupcion.
Durante 2021 a base di rapportnan oficial, DIARIO a expone e realidad di corupcion, cu ta e pio enemigo di Aruba.
