Compania ta ofrece disculpa pa loke a pasa Diahuebs
ORANJESTAD (AAN): E investigacion a keda cla, y ya caba Diabierna den oranan di mainta, e compania WEB Aruba NV a divulga loke a ocasiona e blackout parcial di Diahuebs atardi.
Segun e informe, tabata algun minuut despues di 5:00 pm riba Diahuebs 28 di December, a surgi un corto circuito den un di e transformernan den planta di WEB. Esaki a conduci na un Brown out, un interupcion di coriente pa diferente area di nos isla.
E compania a splica, cu debi na e fayo aki, a pone cu e sistema di pompnan cu ta pomp awa pa Aruba a perde coriente tambe y consecuentemente e presion di awa a cay pa varios parti di Aruba.
Personal di WEB mesora a drenta accion pa isola e causa pa por recupera coriente mas pronto posibel. E proceso aki mester a bay hopi controla pa e planta no cay atrobe, mirando e situacion delicado.
Esaki a dura un total di casi 2 ora y mey. Te finalmente pa 7:29 pm a logra reestablece suministro di coriente 100% pa NV Elmar y consecuentemente pa e isla henter.
Despues cu a descubri e fayo, por a calcula cu lo a dura como 2 pa 3 ora pa recupera e suministro completo pa nos isla. E prome area cu a recupera coriente alrededor di 6:18 pm tabata e area di Hospital y Hotelnan. Despues a sigui e areanan di Palm Beach, Noord, sigui pa Balashi y Parkietenbos, sigui pa Santa Cruz, Savanta y Pos Chikito. Finalmente a logra reconecta San Nicolas.
E secuencia den recuperacion di suministro di coriente pa e diferente areanan ta depende di stabilidad di e red di coriente y demanda di coriente na e momento ey. A logra reestablece e presion y suministro di awa alrededor di 7:13 pm pa e areanan afecta. Pa 7:29 pm, e ekipo di produccion di WEB a logra reestablece coriente na e partinan afecta hunto cu personal di Elmar na e substationnan rond Aruba.
Durante e periodo di interupcion, gerencia a dicidi di pospone e celebracion cual tabatin planea pa empleadonan di WEB na e momento ey. Debi na e brown out no tabata prudente pa e celebracion sigui. A pidi comprension di empleadonan y a enfoca completamente pa sigui cu recuperacion di suministro di coriente. Gerencia ta gradici tur empleado pa nan comprension den esaki.
Di parti di gerencia y empleadonan di WEB Aruba, ta ofrece disculpa pa e inconveniencia causa pa e brown out di 28 di december. Gerencia ta hopi consciente cu un interupcion di coriente y/of awa no ta agradabel y ni conveniente.
Empleadonan di WEB su departamentonan di produccion di coriente y awa, pero tambe esnan di sectornan di mantencion, di asuntonan tecnico, di distribucion di awa y departamento di comunicacion, tur a haci nan maximo esfuerso pa a limita e tempo di brown out mas tanto posibel y pa mantene comunidad informa. Un biaha mas WEB su gradicimento pa e comprension y pasenshi.
