Su apelacion den Corte di casacion a keda rechaza
ORANJESTAD (AAN): Diamars mainta Corte Supremo na Hulanda a dicta sentencia den e apelacion di Paul Croes contra e sentencia di Corte Superior.
Por a compronde cu Corte Supremo a rechaza e motibonan di apelacion di Paul Croes y a dicidi cu ta mantene e sentencia di Corte Superior.
E tres Huesnan (Hof) di Corte Superior ta haya ex minister Paul Croes culpabel cu entre e periodo di October 2013 y Maart 2017 a haci corupcion door di laga su mes wordo cumpra pa facilita permiso di traha. Hof ta mustra cu e cumpramento tabata sosode via di e fundacion “Stichting Leadership and Excellence”.
Hof a condena Paul Croes na 3 aña di prison, kitando e tempo cu e tabata sera den KIA. Tambe cu Paul Croes ta wordo kita como empleado di Gobierno y cu pa un periodo di 8 aña e no por postula pa eleccion.
Paul Croes a apela e sentencia aki y Corte Supremo (6 Hues) a evalua e kehonan di parti di e abogado di Paul Croes contra e sentencia di Corte Superior. E Abogado General den Corte Supremo a rechaza e kehonan y a pidi Corte Supremo pa mantene e sentencia di Corte Superior.
Ayera mainta, Corte Supremo di Hulanda a duna di conoce su decision. Corte Supremo a rechaza e apelacion di Paul Croes y ta mantene e sentencia. Esey ta nifica cu Paul Croes ta keda condena na 3 aña di prison, kitando e tempo cu e tabata sera den KIA. E ta wordo kita como empleado di Gobierno y pa un periodo di 8 aña, e no por postula pa eleccion.
E decision di Corte Supremo ta nifica cu Paul Croes mester bay sera den KIA. Lo por spera cu lo bay palabracion ki dia Paul Croes lo mester presenta na KIA pa e sinta su castigo.
