Banco por nenga di habri cuenta pa preveni riesgo di integridad
- Banco ta opina cu nan tin base di libertad di contract
- E caso ta rond di e compania Bochincha
ORANJESTAD (AAN): Cu e veredicto den prome instancia di 3 februari 2021 Aruba Bank a wordo ordena pa habri un Cuenta na Florin di banco pa e compania BCY Entertainment VBA, manehando bao di e nomber di ‘Bochincha’. Esaki ta un compania di minister anterior Otmar Oduber, bou di e condicionnan usual y pa un tarifa usual mientras cu no lo wordo dicidi otro den un procedura principal, stipulando cu Aruba Bank ta autorisa pa termina e cuenta di banco aki den caso señor Oduber wordo sentencia door di hues criminal pa e crimennan cu e ta wordo sospecha di dje.
Aruba Bank a bay den apelacion contra e veredicto aki, pasobra e ta di opinion cu a base di libertad di contract (e libertad pa dicidi cu kende y, si t’asina, bou cua condicionnan por cera un acuerdo) no por wordo obliga pa habri un cuenta di banco pa empresanan cu no ta cliente di Aruba Bank ainda.
Cu e veredicto di 31 october 2023 Corte di Husticia Comun di Aruba, Corsou y Sint Maarten y di Bonaire, Sint Eustatius y Saba a duna Aruba Bank al fin y al cabo rason. Corte Comun a rechaza e veredicto den prome instancia y a considera entre otro:
“Teniendo na cuenta e echonan ku e Banco a constata, considerando nan den nan contexto, e Banco tin un interes bon fundi y grandi pa preveni riesgo di integridad y daño reputacional por asociacion cu Oduber.”
(…)
Ademas di preveni riesgonan di integridad y dañonan di reputacion relaciona cu esey, e Banco tin interes den mantene un bon relacion cu e banconan coresponsal.
(…)
Corte Comun ta opina cu e interesnan di e Banco mane menshona anteriormente ta prevalese riba e interesnan di BCY y otro. Esaki ta nifica ku e Banco, bou di e circumstancianan menshona anteriormente, por rasonablemente nenga pa habri un cuenta bancaria na fabor di BCY.”
Aruba Bank naturalmente ta hopi satisfecho cu e resultado di e apelacion. E veredicto ta confirma entre otro cu sospecho di delitonan (grave) por ta suficiente pa un banco nenga un persona of un entidad un cuenta bancario.
Aruba Bank den prome instancia a wordo asisti pa abogado Theresa Croes-Fernandes Pedra di Juridische Praktijk GEFMA y den apelacion tambe pa abogadonan Roderik van Hees y Melitza Willems di VanEps.
