ORANJESTAD (AAN) – Minister di Salud Publico, Dangui Oduber, den conferencia di prensa Diahuebs mainta, a elabora riba e invitacion cu como titular di Salud,
el a ricibi pa bishita Wonden Poli (Clinica di Herida) na Dr. Horacio Oduber Hospital (HOH).
Minister Oduber a expresa cu sigura tabata un honor pe ta presente na e “Center for advanced wond care” aki, na prome lugar pa conoce e personal y, na di dos, pa wak e trabao y servicio cu ta wordo brinda na specialistanan y consulentenan cu ta atende tur e asegurado y pashentnan.
“Mi tin cu bisa cu mi a keda sumamente impresiona, pa e nivel halto di calidad di cuido y servicio cu ta wordo brinda pa tur e profesionalnan aki, den un facilidad hopi moderno cu nan tin, despues di e renovacion di e parti aki di Hospital, unda nan ta atende un gran cantidad di pashent”, e dignatario a señala.
El a agrega cu atravez di e añanan e cantidad di pashentnan aki ta creciendo y na e momentonan aki nan ta haciendo 17 mil consulta pa aña.
“Hopi di nan ta pashentnan diabetico. Hopi di nan ta wordo atendi casi diariamente, y por mira tambe cu e proyeccionnan cu nan a haci ta constata cu e proximo añanan nan ta bay mira un subida di e cantidad di consultanan, y pesey tambe e Plan Nacional di Prevencion, ta asina importante”, Minister Oduber a subraya.
E dignatario a splica cu mayoria di e pashentnan cu ta wordo atendi pa nan heridanan cu ta perde un of dos dede, of ta perde pia; e calidad di bida ta baha ora nan haya un amputacion.
“Kiermen, no ta un trabao facil ta wordo haci pa dr. Yuri Casseres y henter e team. Pero mi tin cu bisa cu nos ta sumamente orguyoso di henter e team”, e mandatario a reitera.
Minister Oduber a agrega cu gobierno ta enfocando riba e Plan Nacional di Prevencion, pa educa y concientiza e comunidad pa hiba un bida mas saludable, pasobra nan ta mira con e gastonan ta sigui subi, e problemanan ta bira mas grandi y tambe e retonan pa hospital. Pesey tabata tin un diferencia di opinion cu Hulanda, for di principio, den e discusion riba e 60 miyon florin, pasobra gobierno ta experiencia awe con importante ta, pa sigui haci inversionnan den cuido y con e cortamento aki ta afecta un departamento asina importante (Wonden Poli) pa e cuido di pashentnan cu mester di esaki.
