Dr. Rasmijn mustrando cu esey ta pone presion subi
ORANJESTAD (AAN): E fecha di 9 di Maart ta uno cu mundialmente ta dedica tur atencion riba e organo di riñon den e ser humano.
Den un entrevista cu Dr. Dennis Rasmijn, kende tin su consultorio di Docter di Cas na Bubali, el a mustra su satisfaccion cu awendia casi tur Consultorio di Docter di Cas tin un espacio extra destina pa un experto di POH di Wit Gele Kruis ta ricibi pashentnan tambe pa atende. Specificamente pashentnan cu ta sufri di malesa cronico.
Siguiendo ehemplo di Hulanda y otro paisnan, Aruba tambe a introduci e Praktijk Ondersteuner Huisarts (POH) cu awor tey na casi tur Docter di Cas. Nan ta pone cita regular pa atende esnan cu ta sufri di sucu, di presion halto, y ta duna yudanza y recomendacion con pa cambia nan dieta, tips pa reduci nan consumo di sucu, y mas.
Dr. Rasmijn a splica cu e POH tey pa yuda reduci e riesgonan cu e pashentnan di malesanan cronico aki por topa cune, e.o. Dialysis of hasta Ataca di Curazon. E ta tips cu bo Docter di Cas tambe por duna, y tur esaki na beneficio di e pashent.
E profesional medico ta contento tambe cu recien a inaugura e “Healthy Lifestyle Center Aruba” cu ta bay duna servicio na comunidad, incluyendo un dietista cu ta sigur un adquisicion valioso pa asina yuda mas hende bay riba e rumbo corecto.
Tur esaki por duna e mihor informacion di tur loke ta pro, y tur loke ta malo pa bo salud, y un dieta specificamente pa preveni sucu cu presion halto.
Presion halto ta un combinacion di diferente factor cu ta pone esaki subi den bo curpa. Dr. Rasmijn a bisa cu ‘stress’ ta algo cu ta pone presion subi, y pesey tin tambe stress cronico. E factor di mas importante ta e dieta, cu ta un problema grandi na Aruba.
No djis cu e dieta ta malo, pero hopi hende ta come cuminda cu demasiado salo aden. E cultura di e Arubiano pa cu e tipo di cuminda normalmente, loke ta wordo considera ‘sagrado’, no kiermeen cu e ta saludable pa e curpa.
Hopi hende na Aruba ta gusta come cuminda di bleki, y corda cu esaki tin un nivel di sodium, pues salo aden cu ta pone presion subi rapidamente.
Pesey busca informacion con pa reduci salo den cuminda, y reduci presion, y evita cu bo tin di bay haci Dialysis den futuro pa bo riñon.
