Ankie Danker di EPI
ORANJESTAD (AAN): Siman pasa, Gobierno di Aruba, Directie Ouderenzaken y Colegio EPI a firma un Memorandum of Understanding (MoU) na Colegio EPI. Director di EPI, señora Ankie Danker, ta splica di e curso cu EPI ta ofrece na unda cu un persona por haci esaki den su propio tempo. Esaki segun señora Danker, ta un concepto nobo, pero e ta parti di e proceso di flexibilisacion di educacion na Aruba. Hunto cu e mercado laboral, EPI ta ofrece e curso aki na profesionalnan di Aruba.
E curso ta cay bou di e proyecto di Leven Lang Ontwikkelen (LLO) (Lifelong learning). E proyecto, di cua a firma e MOU, tin un duracion di 10 siman y ta haya un certificado. Despues cu habri otro proyecto, por sigui esaki y obtene mas certificado. E certificado ta wordo reconoci den Reino y una bez cu sigui haci mas curso, e persona ta haya e derecho pa haya un diploma.
Segun señora Danker, esaki ta e prome paso cu ta haci den cooperacion cu Ouderenzaken pa e parti di cuido mirando e necesidad pa eleva e calidad di casnan di cuido. Ouderenzaken ta cubri e curso y EPI ta coordina e parti logistico.
Directora di EPI a remarca cu ta e intencion pa bin cu mas proyecto riba otro tipo di experticio, entre otro, economia, tecnico, hospitalidad.
“Den futuro, ta haci esaki den cooperacion cu otro companianan, cu ta esunnan cu ta paga pa nos por profesionalisa nan personal”, señora Ankie Danker a bisa.
