Secretario di Estado Alexandra Van Huffelen
ORANJESTAD (AAN): Mehora nivel di bida, cuida y proteha naturalesa y medioambiente y traha riba bon enseñansa y un economia mas diverso, esaki ta temanan principal cu Secretario di Estado Alexandra Van Huffelen ta bay traha riba dje e proximo añanan.
Den e carta cu el a manda awe pa Tweede Kamer e ta anuncia cu pa logra esey, cooperacion a base di igualdad ta e punto di salida di tur su esfuersonan.
Den e carta e Secretario di Estado ta describi e oportunidad- y retonan pa e parti Caribense di Reino. Di 11 te cu 24 di februari el a bishita e seis islanan. E ta constata despues di e bishitanan ey cu cada un di e islanan tin nan propio necesidadnan y cu tin mester pues di un acercamento na midi.
“E islanan ta ofrece masha hopi oportunidad mes, basta e habitantenan haña oportunidad pa probecha di nan”, e Secretario di Estado ta bisa. “Mi ta mira como mi encargo pa duna sosten den esey. Hunto cu gobernante- y habitantenan di e parti Caribense di Reino mi kier bay traha duro pa logra esey. Naturalmente respetando tambe e posicion autonomo den e mesun Reino ey.”
Secretario di Estado Van Huffelen na prome instante ta preocupa pa e pobresa cu el a mira riba e islanan. “No obstante e esfuersonan di e gabinetenan anterior, mi ta constata cu e hendenan na Boneiro, Saba y Sint-Eustatius no ta ripara esey suficientemente den nan potmoni.”
Den e acuerdo di gobernacion a palabra cu structuralmente tin 30 miyon euro disponibel pa Hulanda Caribense, banda di 35 miyon euro pa conservacion y restauracion di naturalesa.
Pa loke ta trata e Secretario di Estado, cooperacion a base di igualdad ta para central den e relacion cu e paisnan Aruba, Corsou y Sint Maarten. “Tur e tres paisnan ta parti igual di Reino y esey ta e base riba cua nos ta traha hunto riba futuro.“
Retonan cu e paisnan ta enfrenta den esey ta entre entre otro e pobresa creciente, falta di capacidad di implementacion y un estado di derecho cu mester di refuerso. “Ta retonan serio pa cua nos mester probecha di e forsa di Reino. E paisnan ta na turno pa traha riba solucionnan, pero den esey nan no ta para nan so. Esey ta nifica tambe cu nos ta comprometi cu bon gobernacion y gobernacion integro, cu ta comprometi pa garantisa derechonan humano.”
Ta intencion pa hunto cu e islanan y e ministerionan concerni, sigui detaya e plannan den e carta di prioridadnan di maneho (hooflijnenbrief). Kamer ta ricibi resultado di esey prome cu zomer.
