Darlaine Guedez-Erasmus:
ORANJESTAD (AAN): E no ta desconoci cu na Aruba nos tin un reto den e area di salud mental unda nos tin listanan di espera largoe. Mirando e situacion aki Minister di Husticia y Asuntonan Social a mira e urgencia y kier a aporta na un solucion concreto. Asina dia 2 di juni 2022 Algemene Ziektekosten Verzekering (AZV) y Rampenbestrijding Aruba (BRA) a firma un convenio. Esaki ta pa atende cu e lista di espera pa cu salud mental.
E proceso: Gobierno di Aruba a acerca Rampenbestrijding Bureau pa bin cu un plan pa por reduci e lista di espera. Den luna di september 2021 BRA a sinta cu e instancianan concerni. E team a sinta cu Respaldo y AZV pa haya clarificacion di cifra di pashent. Actualmente tin 280 persona riba e lista di espera. Cu e fondonan aloca door di AZV, cual ta trata di un suma di 450 mil Florin, lo yuda pone profesional manera psicologo, enfermera, trahado social y persona den e parti administrativo.
E proyecto: E intencion di e proyecto aki ta pa duna e cuido necesario na e momentonan aki, pero tambe pa haya informacion di ki tipo di cuido mester worde duna. Por ehempel, pa cuanto hende, ki categoria di edad, cuanto ora lo tin cu worde dedica, cua profesional mas mester, ki tipo di enfermedad et cetera. Pa medio di e proyecto aki por haya tambe un miho bista di kico ta e necesidadnan na e momento aki den nos comunidad. Unabes cu nos tin un claridad riba esakinan nos por cuminsa sondea e posibilidad pa stipula tur locual ta necesario y asina percura cu e ayudo aki ta duradero. Como Parlamentario mi ta haya ta hopi necesario y ta contento cu AZV ta mira e importancia di e parti di salud mental. Normalmente e ayudo psicologo no ta worde brinda door di AZV, pero den e proyecto aki si e lo ta posibel.
Pa finalisa mi por bisa cu mi ta contento di mira e bon colaboracion di diferente instancia, departamento y Minister di Asuntonan Social y su ministerio, Minister di Salubridad Publico y su ministerio y tambe Minister Presidente mr. Evelyn Wever-Croes pa aporta na e parti aki pa por sobrepasa e reto cu nos ta worde enfrenta cu ne.
