Ora cu e bisiña tabata tira wowo pa bo yiu:
ORANJESTAD (AAN) – Siguiendo cu e entrevista cu Kimberly de Cuba-Kelly, Trahador Social na Telefon pa Hubentud (131), el a elabora tocante e rol di mayor den e desaroyo lamentable cu tambe tin den e comunidad di Aruba, unda ta conoci cu tin hobennan cu ta ofrece nan curpa a cambio di placa.
Ta conoci tambe cu hopi hoben kier tin e top modelo di paña, zapato, articulonan electronico, etc., y nan ta busca manera pa haya cen pa tambe adkiri eseynan.
Kimberly a subraya cu e pensamento su tras asina grandi ta comunicacion. “Pasobra na momento cu un persona tin bon comunicacion cu su yiu, nieta, of subrina, cu e familiar hoben, hopi cos nan ta scoge pa no haci, na momento cu bo ta papia constantemente, no tey ora e hoben ta confronta cu e reto aki. Pero door di a papia y dun’e informacion, bo ta haci cu na momento cu mester tuma e decision aki, e ta mas conciente di e decision cu e ta tuma”, Kimbely a señala.
Telefon pa Hubentud no tin un grupo di preocupacion di un edad specifico. Nan ta preocupa pa tur edad pasobra esaki ta varia cu tempo. Pesey tur informacion preventivo nan ta cuminza for di kleuter, y ta keda adapta na e grupo cu nan tin nan dilanti, y adulto tambe ta haya charla preventivo tocante e tema aki, door di FTPH.
Kimberly a agrega cu semper Hubentud den Movecion tin temanan cu ta bin acerca mas biaha, y nan ta keda monitor cual ta esun cu mas ta subi.
El a splica cu semper e tema di violencia ta un di esnan mas halto, pasobra hopi biaha bullying ta cay den e parti di violencia. E tema di problemanan social tambe ta den e top mas halto.
Kimberly a señala cu muchanan tambe tin problemanan social y hopi biaha FTPH ta haya cu e hobennan mes ta pidi pa nan tin un miho comunicacion cu nan mayornan. “Nan ta bisa tambe cu nan kier mas tempo di nan mayornan, pero aunke no por bisa cu esaki ta imposible si por bisa cu e ta dificil, pasobra nos ta biba den un Isla unda economia no ta asina facil, pasobra tin famianan unda ambos mayor ta traha of na unda un mayor so ta presente, y e mester traha tin cu haci dos of tres trabao, y esey ta pone cu e no tin e mesun tempo pa e educacion di su yiunan”, Kimberly de Cuba a señala.
Tambe ta asina cu e control social den bario, unda cu e bisiña ta na haltura ki ora e yiu ta yega cas, e ta avisa e mama si e ta sali, y esey no tey mas! Nos a sali di un comunidad asina pa un comunidad di “mine my business” y “abo keda for di my business”, De Cuba-Kelly a subraya.
Pues, FTPH ta mira cu esey ta haci cu e control social ta asina abao cu por cu cosnan menos bon ta sosode bao hopi di nos hobennan, manera e tema cu a trece dilanti den e entrevista aki.
