Na 2025 Reino ta bolter promesa falso cu ta deshaci di medidanan
*Exponentenan ta haci cu no por considera Futuro un cara nobo
*Webo di oro di avestruz lo bira pagara den Corte Supremo di Reino
ORANJESTAD (AAN) — Un di e factornan principal di e eleccionnan cu a tuma lugar tabata e forma cu AVP kier a uza e medidanan cu Gobierno Wever-Croes a tuma pa scapa Aruba di e desastre financiero cu Mike Eman a crea.
E maneho cu a wordo hiba dor di Gobierno Evelyn Wever-Croes, tabata basa como e unico remedi pa scapa Florin Arubano for di morto.
A base di Statuut, Reino Hulandes a actua directamente na bienestar di Pueblo di Aruba,y a Gobierno Mike Eman y Aruba bou supervision.
Ni awor cu tin placa den caha di Aruba a base di e maneho di Gobierno Evelyn Wever-Croes, Hulanda ta tolera pa Aruba perde control atrobe riba su maneho financiero y esaki ta e base principal di gobernacion durante e añanan venidero cu manera Reino a adverti, lo no nifica cu gobiernonan di Aruba ta haya oportunidad pa haci mal uzo di placa di Pueblo di Aruba pa asina nan haya popularidad politico.
DIARIO un par di dia pasa a aborda e realidad cu Aruba ta forma un Gobierno bou supervision Hulandes.
Esaki ta e motibo cu no sin mas por forma un gobierno pa Aruba actualmente pasobra Hulanda ta insisti riba palabracionnan concreto cu ta deshaci di e posibilidad pa atrobe abusa di placa di Pueblo pa haya voto.
Kende y kico ta forma un Gobierno nobo, mester wordo mira den e luz di un bon maneho financiero cu mester sigui cu e maneho pa tin placa den caha den Aruba pero tambe un maneho cu ta preveni cu atrobe ta uza placa di Gobierno pa politiconan por goberna.
2025 ta bira aña cu Hulanda lo exigi cumplimento estricto di e reglanan cu el a impone sigur despues cu Gobierno Wever Croes a introduci e formula di integridad den Gobierno y asina haci cu casonan di corupcion a wordo atende na un forma serio.
Na 2025 e Caso Avestruz cu a duna prueba di kico corupcion a haci cu Aruba, ta sigui na Hulanda den Corte Supremo y lo haci cu na Hulanda mas cu nunca tin atencion pa e forma cu corupcion a bira practica den e Gobierno di Mike Eman.
Informantenan clave a informa DIARIO, cu no por considera Futuro un cara nobo den politica.
Futuro ta un partido cu ta forma dor di Gerlien Croes, kende hasta a wordo considera como heredero di AVP pa e contacto cu den publico e tabata demostra cu Mike Eman.
Ta conoci cu Gerlien Croes a bay cu un grupo grandi di AVP y cu Mike mester a uza Wendrick Cecilia cu como hoben a atrae votadornan nobo cu no conoce e historia real di AVP.
Mescos cu AVP, Futuro tambe tin dos lider y den e caso aki te ainda mr. Geoffrey Wever como representante di Raiz cu no a haya voto pa drenta Parlamento, ta forma parti di Gobierno Evelyn Wever-Croes como Ministro di Raiz.
Proyectonan cu el a atende ta ainda den su man, mientras e ta parti di e comision di Raiz cu mester forma un Gobierno cu AVP, cu ta nifica pues cu Gerlien y Mike ta topa atrobe den gobernacion di e pais.
Expertonan ta indica cu e transicion politico di Aruba ta exigi informacion intenso na Pueblo di Aruba, ya cu no ta normal manera DIARIO for di momento cu eleccion a wordo yama, cu Geoffrey Wever ta Ministro pa un partido cu a kibra sin motibo palpabel, e acuerdo di gobernacion cu MEP pa asina yega na un eleccion nobo, caminda e Ministro di Raiz cu no a haya voto, ta Ministro pero ta negocia un gobierno nobo cu partidonan cu ta contra e Gobierno di cual e ta tuma parti.
Hulanda sigur tin atencion pa e situacion unico na Aruba, caminda manera anteriormente DIARIO a indica, Mike Eman ya a cuminsa habri porta pa despedi di aumento di pensioen cu 700 Florin, cu ta contra e posicion cu RAIZ a tuma enfrente e necesidad pa scapa fondo di pensioen di behez SVB for di desastre.
Hulanda tin atencion total pa e situacion na Aruba y sigur loke ta pasa y lo mester pasa cu placa di Pueblo di Aruba, cu sin asistencia di Reino Hulandes lo no tabata tin pan riba mesa awe, manera Gobierno Wever-Croes a logra pero cu segun Hulanda ainda ta no basta!
Expertonan ta asegura cu supervision Hulandes lo ta mas estricto cu nunca den cuadro di e falta di transparencia riba desaroyonan sumamente serio na porta di formacion di un gobierno nobo den un situacion cu no por cualifica Futuro cu ta den Gobierno y den formacion di otro gobierno, como un factor normal politico sigur si tene cuenta cu tampoco por considera e partido uno nobo ya cu su cabezantenan ta derivadonan di AVP y e partido Raiz cu a crea caida di Gobierno Wever-Croes.
