Directora di Departamento di Adulto Mayor:
ORANJESTAD (AAN) Señora Desiree Thodé-Helder, director di Departamento di Adulto Mayor, den entrevista cu DIARIO a expresa su satisfaccion, cu su Departamento a firma un Acuerdo di Cooperacion cu Colegio Educacion Profesional Intermedio (EPI), den e trayecto di cursonan y opleidingnan pa trahadornan di casnan di cuido.
“Esaki ta sigur un prome stap y uno hopi grandi tambe, pasobra nos a haya Colegio EPI na nos banda, pa sigui e tipo di cursonan den e programa aki, cu ta aporta hopi conocemento na e personanan cu ta traha den cas di cuido”, señora Thode-Helder a señala.
Aworaki nan ta cuminza cu e prome 15 certificadonan pa personanan cu ta traha den cas di cuido y asina cada biaha nan ta planea mas di e temanan aki, pa involucra hopi mas hende cu ta trahando actualmente, den e tipo di cursonan aki, pa nan hisa nan conocemento, mehora e calidad di cuido, y pa haya mas hende educa, den e casnan di cuido.
Señora Desiree Thode a menciona cu nan ta ocupa aworaki cu un encuesta pa e hobennan, pa puntra nan kico enberdad nan ta pensa tocante nan carera, si nan kier enberdad bay den e area di cuido, y si nan no kier, no tin interes, puntra nan pakico no.
“Ora nan bisa pakico no, nos por incentiva nan pa drenta den un carera den e ramo aki”, Directora di Departamento di Adulto Mayor a bisa.
El a señala cu tur curso ta trece un mayor conocemento, y e area aki, naturalmente, ta cambia hopi. “Tin hopi cosnan nobo, innovativo, cu sigur cu e cursonan aki bo ta engrandece bo conocemento y bira miho dunador di cuido”, e dama a subraya.
El a agrega cu e profesion ta hopi importante. “Enberdad Aruba mester di hendenan den cuido, nos ta depende grandemente di nan pasobra no ta solamente adulto mayor pero tur persona na Aruba mester di cuido de bez en cuando. Nos mester di profesionalnan den e ramo aki y pesey nos kier stimula tur e mayornan y tur hende na jong cu nan ta, of cu kier algo otro, pa nan toch wak si esaki ta algo pa nan, pa bin Colegio EPI, pa busca mas informacion”, señora Desiree Thode-Helder a señala.
