Remitido
"Sr. Redactor, Sea asina bon di duna mi un tiki espacio den e corant mas lesa na Aruba, pa mi por trese lo siguiente padilanti. Ami y mi casa ta biba na San Nicolas den nos propio cas. Awe mainta tempran dos trahador di Elmar a yega mi cas y a kita coriente. Ora mi a puntra nan pakico?; Kico ta e problema? E contesta tabata: "nos no sa; bay Oranjestad, bay puntra ayanan".
Despues mi mes a pensa cu e trahadonan a kita coriente pa motibo di un supuesto retraso den e pagamento di e factura.
Wel, ta lo siguiente. Mi cas tin airco. Solamente den dormitorio. E airco aki ta wordu usa entre, ban bisa 10 or di anochi te cu mas o menos 7/8 or di mainta. Mi tin mi recibonan warda. Mi por bisa cu mi uso mensual ta un averahe di 300 kilowatt. Mi kier ta fair, papia berdad y bisa cu na oktober di aña 2022 mi a usa 622 kilowatt, loke a spanta mi.
Segun Elmar mi a usa durante maart 2018 -no spanta-7811 kilowatt, durante 29 dia y Elmar a manda mi un factura pa paga mas cu 3 mil florin. (esaki despues cu durante FULL UN AÑA Elmar A KEDA SIN CHECK E METER; nan mes ta skirbi riba e factura: "estimate" (chupa dede y yega na un suma).
Mi a protesta varios biaha, verbalmente y por escrito -un biaha por escrito via un carta di mi accountant, cu a yega na un uso averahe di 310 kwh durante 3 aña- contra e cobramento di e suma aki.
Elmar no a contesta mes! Elmar ta e unico compania cu ta suministra pueblo/nos cu coriente; un compania di nos tur. Nos ta dependiente di Elmar y pa Elmar yega corta coriente sin tene cuenta cu nos protesta ta falta di respet y un abuso di marca mayor! Of ta asina cu Elmar, compania grandi cu ta traha cu placa di mi y di pueblo, kier forza nos, un chikitin, pa bay bringa nan den corte?"
Atentamente,
Sr. Riguang Zhou
Weverstraat 42
