Banco Central mustrando: *Prijs mas halto ta un preocupacion grandi
ORANJESTAD (AAN): Consumidornan a bira mas pesimista, mirando cu e confiansa di consumidor a baha cu 0,6 punto di indice te na 93,5 durante e di promer trimester di 2022 (Grafiek 1).
Na final di e di promer trimester, consumidornan tabata mas preocupa pa (i) e posicion financiero di gobierno cu lo empeora (Q4-2021: 61 porciento) y (ii) cu e situation economico lo ta mas malo (Q4-2021: 32 porciento). Casi tur e respondentenan (98 porciento) a raporta cu nan ta premira cu prijsnan lo ta mas halto den e proximo 6 lunanan.
Mas cu mitar di respondentenan ta pensa ainda cu haya un trabou nobo ta mas dificil, esta 10 punto di percentahe mas compara cu e trimester anterior (Q4-2021: 41 porciento). Ademas, 31 porciento di respondentenan ta premira cu nan situacion financiero na cas lo deteriora, esta cu 15 punto di porcentahe mas compara cu e trimester anterior (Q4-2021: 16 porciento).
Tanto e indice di expectativa como e indice di e situacion actual a baha, esta cu 1,8 punto di indice te na 94,3 y cu 0,2 punto di indice te na 93,2, respectivamente, den e di promer trimester di 2021.
E cantidad di respondentenan cu a raporta cu compra di un auto no tabata apropia a crece di 66 porciento pa 69 porciento den e primer trimestre di 2022, mientras cu 66 porciento a indica cu haci un prestamo no tabata adecua (Q4-2021: 67 porciento). Tambe, 62 porciento di respondentenan a indica cu tuma un hipoteca no tabata adecua (Q4-2021: 60 porciento).
Como 50 porciento di respondentenan a raporta cu bay cu vakantie no tabata apropia (Q4-2021: 51 porciento). Consecuentemente, e indice di habito di consumidor a keda mescos na 93,9 den e di promer trimester di 2022.
