*Ta trata di materialnan di construccion di calidad halto
*Na Hotel Ibero America
ORANJESTAD (AAN)—Señor Gustavo Serrano Amaya, Consul General di Colombia na Aruba, den un entrevista a invita pueblo di Aruba na un Showroom, organiza pa Pro Colombia.
Ta trata aki di un Showroom di materialnan pa construccion. El a splica cu Pro-Colombia ta un entidad di Gobierno, cu ta pertenece na e Ministerio di Industria y Comercio, encarga di promociona diferente producto y servicio cu nan tin rond mundo.
Den e ocasion aki Pro-Colombia ta presenta un Showroom di materialnan di construccion y p’esey Consul Serrano Amaya ta invita tur empresario, personanan natural y amigonan interesa pa bishita e evento.
“Nos ta bay tey for di 9’or di mainta te 7’or di anochi, na Hotel Ibero America, y ta bay tin e oportunidad di conoce tur e 20 empresarionan di calidad halto cu a bin trece nan productonan, igualmente di calidad halto”, Consul Serrano Amaya a señala.
El a agrega cu si tin personanan interesa pa bira distribuido di e entidadnan aki, na Aruba nan ta bonbini.
Consul Serrano Amaya a comenta cu nan a presenta caba dos showrooms, organiza pa Pro Colombia, tocante productonan alimenticio, unda tambe a bin empresarionan pa ofrece nan productonan di calidad halto. Na Augustus cu a pasa nan tabata tin e ultimo evento.
“Aproximadamente un aña y mey pasa tambe y e idea ta pa sigui organiza eventonan, como parti di e trabao di Pro Colombia. Pro Colombia ta un entidad cu tin hopi aña y su obhetivo principal ta incentiva nos productonan y servicionan den exterior, y haci e contactonan entre empresarionan y personanan interesa den negocia cu Colombia”, Consul Serran-Amaya a duna di conoce.
