Pa cuanto aña a construi Hospital y con lo a adapta na tempo?
*Renobacion continuo di centronan medico ta mas popular
*Reformulacion cuido medico ta reduci cuido na hospital
ORANJESTAD(AAN)—Mester sigui papia di Hospital di Aruba y mester cuminsa haci Pueblo participante di un necesidad di comunidad y un parti integral di Salud Publico (cu ta inclui Cuido Medico).
E concepto “hospital” como parti di cuido cu sector medico ta duna den e desaroyo di Salud Publico, a conoce y lo conoce cambio continuo a base cu ciencia conoce progreso y asina exigencianan adapta.
Na momento cu a construi Hospital, manera DIARIO a splica, mester a haci Pueblo participante di un plan total pa duna contenido na e buskeda di adaptacion continuo di e sector encarga cu Cuido Medico y desaroyonan cientifico.
Den mundo di Salud Publico sigur ta conta, cu Pueblo mester ta bon informa pa asina e por haci maximo beneficio di loke e sector por produci y comprende tambe kico realmente ta na su beneficio riba tur tereno.
Cuanto permanencia den hospital ta costa? Cuanto cama di Hospital Aruba mester? Cuanto espacio tin pafor di e Hospital pa atende cu casonan cu por exigi espacio pa wordo atende pa personal cualifica den sector medico y para medico?
Hopi biaha estadia den Hospital ainda ta mara na conceptonan cu no ta valido mas. Un realidad cu mester atende pasobra e ta pone peso tambe riba e forma cu publico ta mira necesidad pa cuido medico y por provoca sentido di disgusto cu no ta na su lugar.
Mas y mas e estadia den hospital lo wordo limita. Tur esaki ta relaciona cu e forma cu ciencia ta progresa pa medio di ekipo, conocemento, y investigacionnan cu ta wordo haci no solamente den laboratorio pero cu cifranan y informacionnan cu segun sistemanan computerisa, mester aporta na mas y mihor Salud Publico.
E placa cu tin disponibel mester wordo uza na un forma responsabel y no por sigui e guia di costumber, pero mester wordo adapta na loke ta beneficio di un pashent.
Informacion y mas informacion ta basico pa asina tur miembro di comunidad por aporta na nan propio salud, cu hopi bez nan mes ta pone na peliger pasobra nan no kier biba cu e realidad cu no ta wordo presenta manera mester ta.
Prevencion afortunadamente a haya un acento clave den Salud Publico, algo cu mester aplaudi.
Pueblo, Gobierno y Salud Publico den su totalidad, mester ta uno den e lucha pa Salud di Pueblo y informacion mester aporta na esaki.
Con por preveni estadia den Hospital dor di chekeo regular? Con preveni situacionnan serio cu a wordo neglisha?
Pa bolbe na principio di e articulo aki. Hopi tempo a transcuri for di e momento cu a pone e prome piedra di e hospital cu si el a wordo termina na 2015 ya lo mester a cuminsa pensa den direccion di renovacion.
Un pelea nacional no ta asisti Aruba den e buskeda pa formulanan cu mester sostene bienestar di Salud Publico. Bon informacion pa asina Publico comprende maneho y loke ta na su interes, mester wordo cubri cu fondonan cu ta bini liber ora hunto comunidad y hospital baha gasto cu por wordo evita dor di por ehempel un programa continuo di adaptacion y renovacion di e edificionan, cu ta parti di infrastructura total di Hospital, como parti di Cuido Medico y Salud Publico.
