Lider di Parlamento mester ta prueba di respet di Democracia Constitucional
*Hamber pa Poder ta entrega e prueba di falta di Corte Constitucional
ORANJESTAD (AAN) — Awe mundo ta aplaudi e logro grandi di Aruba y nomber di Aruba, cu pa motibo di e bon reputacion mundial di Gobierno Wever-Croes, ta anima ciudadanonan di paisnan grandi pa haci negoshi cu Aruba, pa trece proyectonan pa Aruba y duna sosten financiero na Aruba pa e pais por sigui atende cu e desastre grandi cu Gobierno Mike Eman a crea pa e pais prome cu Covid-19 a bati na porta.
Ta e forza di gobernacion di Gabinete Evelyn Wever-Croes, a haci cu Aruba por a sigui cana dilanti y como ganador di eleccion 2021 por a dicidi pa scoge Raiz cu dos asiento pa forma un coalicion.
Awe Reino y mundo ta papia cu admiracion y confianza di Gabinete Evelyn Wever-Croes cu na e momentonan aki ta goza cu e mayoria aplastante di votadornan, mientras cu e partido Raiz ta rementa y mester mira con ta tira raiz pa haya e votonan cu su actual ministro Geoffrey Wever lo bay cune pa asina reforza e partido Futuro, derivado di partido AVP cu a bandona AVP na e momento cu Mike Eman a exigi pa e delincuente sentencia Benny Sevinger keda den Parlamento di Aruba.
Na e momentonan aki un mayoria di traicion por a wordo forma den Parlamento di Aruba y por mira con esnan cu a exigi pa e delincuente cu ta den Parlamento, Benny Sevinger, bay cas, ta tene man di Benny Sevinger pa asina por manda Gabinete Wever-Croes cas.
Pues votadornan di loke awe ta yama su mes oposicion di Aruba, na cual Raiz a dicidi di uni su mes, a bay contra nan propio consenchi y base di moral cu nan a presenta na Pueblo ora nan a bandona AVP pasobra Benny Sevinger mester a keda den Parlamento.
Por conclui cu enemigo politico ta uno cu enemigo politico atrobe den Parlamento pa asina trata na kibra e mayoria aplastante di sosten di Prome Ministra Evelyn Wever-Croes, cu nan kier manda cas prome cu eleccion pa asina nan duna prueba cu nan tin poder.
Aruba ta conoce uno di su momentonan mas tristo despues di e traicion di Betico Croes na 1985 y e entrega di Aruba na 2009 na Mike Eman, cu a deshaci di Status Aparte ora el a trata na tur forma pa mata Florin.
Ta pasobra awor Mike Eman a mata tambe moral di Aruba den Parlamento y a exigi presencia di Benny Sevinger, dos partido nobo a nace di Gerlien Croes y di Rycond dos Santos.
Pero awor Futuro, ta uni cu Benny Sevinger y partido AVP y e resto di RAIZ cu Futuro mes a kibra pa asina fuera di tur norma, manda Evelyn Wever-Croes, cas como Ministro Presidente.
Un caos ta wordo produci na e momentonan aki na Aruba pasobra awor mester bolbe na Ley, cu no por duna ningun contesta pa e situacion cu ta presenta.
Na momento cu Gobierno Evelyn Wever-Croes 2 a bira demisionario, ya el pone un fin na su existencia y hasta a proclama futuro di Raiz, cu a kibra cu salida di Geoffrey Wever y lo tin problema pa haya dos asiento atrobe.
Pero e sistema legal di Aruba ta bay mas Leu. Na momento cu Gobernador a acepta retiro di Gobierno Evelyn Wever-Croes, e asina yama “Ontbinding der Staten”, a bira realidad.
Esaki ta nifica cu e constelacion actual di Parlamento tambe ta demisionario. Awor e constelacion aki di Parlamento aki tin poder pa manda Gobierno cas?
Realmente nan no por tin esaki pasobra mescos cu Gobierno na e momentonan aki no por tuma decisionnan importante pa Aruba, e constelacion di Parlamento tambe ya tin un fecha cu e ta muri.
Awor con un constelacion moribundo di Parlamento por manda un Gobierno demisionario cas?
Esaki ta uno di e preguntanan cu tabata motibo pa den Reino a papia di un Corte Constitucional, cu ora leynan cu no conoce hurisprudencia y situacionnan legal cu ta rementa ley presenta, por dicidi kico ta pasa.
Sint Maarten ta e unico pais den Reino cu conoce un Corte Constitucional, cu na e momentonan aki por dicidi kico mester pasa mientras Parlamento enbez di defende bentaha politico di personanan cu por perde nan salario den Parlamento, ta bira e instituto cu e mester ta, pa defende e bienestar di Aruba cu ta wordo pone na peligro pa dos voto di Raiz, cu kibra e base moral di cooperacion pa gobernacion, dor di kibra e acuerdo di cooperacion pasobra Raiz no stima e Presidente di Parlamento mr. Edgard Vrolijk, cu a trata di pone orden den Parlamento cu a wordo abusa manera e actitud di RAIZ y otro partidonan di oposicion ta duna prueba.
Unda moral a keda? E pregunta serio cu mester ricibi contesta na e momento cu Oposicion no ta respeta ni su propio opinion y ta pone Benny Sevinger riba pedestal!
