ORANJESTAD (AAN): Desde 2019 131 a incorpora un Conseho Hubenil den e organizacion.
E Conseho Hubenil di 131 su tarea ta pa primeramente duna conseho solicita y no solicita na e organizacion. Tambe nan ta duna conseho ariba proyectonan di 131, prome cu nan ser implementa. E Conseho Hubenil di 131 ta duna e organizacion un bista cu precision di kico ta tumando lugar bao di mucha y hoben y pakico.
E Conseho Hubenil ta consisti di 5 hoben, mucha muher y mucha homber, entre e edad nan di 11 pa 24 aña. E personal di 131 ta den contacto estrecho cu e Conseho Hubenil pa asina aki por scucha kico segun nan ta e preocupacionan y problemanan bao di nos muchanan y hobennan.
Tambe e Conseho Hubenil ta ricibi diferente training for di 131 pa asina aki nan tin mas conocemento tocante diferente sector y asina ekipanan mihor. Pa dunanan mas conocemento di e sector social, educacion y husticia, ta organiza diferente bishita na instantcianan pa nan.
Riba 8 di mei ultimo e Conseho Hubenil a haci un bishita na Formacion Social na Mariniers Kazerne Savaneta. Intencion di e bishita tabata pa e Conseho Hubenil di 131 por haya un bista di kico e hobennan cu ta participa na Formacion Social ta ricibi durante e temporada cu nan ta participa na e proyecto. Con e hobennan ta experiencia Formacion Social y kico nan a siña durante nan temporada den Formacion Social.
E Conseho Hubenil di 131 a ser ricibi pa e coordinadora, e trahador social, e grupo di hobennan femenino y e grupo di hobennan masculino. Primeramente e coordinadora a duna un presentacion tocante formacion social na e Conseho Hubenil. Despues e grupo di hobennan femenino y masculino a comparti nan experiencia di e proyecto cu e Conseho Hubenil. E Conseho Hubenil tambe a haya e oportunidad pa haci pregunta na e hobennan.
E Conseho Hubenil a keda masha contento di por a ricibi informacion tocante Formacion Social. Tambe nan a keda impresiona di scucha di e hobennan con cambionan positivo a tuma lugar den nan bida despues di nan participacion na Formacion Social.
131 y e Conseho Hubenil di 131 kier a gradici Formacion Social y e hobennan pa ricibi nos y pa informacion comparti.
E Conseho Hubenil di 131 por ser incorpora den 131 danki na sosten di Setar N.V, Aruba Airport Authority N.V. y The Salamander Group.
