Directie Natuur en Millieu Aruba:
ORANJESTAD (AAN): E blenchi aki cu colornan esmeralda briyante y blauw (Chlorostilbon mellisugus) ta un di e tres blenchinan cu nos por encontra na Aruba.
E blenchi aki y e dornasol ta e dosnan mas comun y cu a adapta y ta broei aki. E blenchi cu nek blanco ta un bishitante y poco comun. E blenchi color esmeralda ta esun di mas chikito pero ta esun di mas teritorial.
Na Ingles ta yam’e 'blue tailed hummingbird' y na Hulandes 'groene kolibrie'. E blenchi macho ta midi entre 7.5 pa 9.5 cm y e embranan por midi te 7.5 cm. E Comite di Ornitologo Internacional (COI) ta reconoce shete subespecie di blenchi.
E manual di parhanan di mundo di BirdLife International ta reconoce ocho. E sortonan di blenchi tin diferencianan poco dificil pa distingui. E cara di e blenchi tin manera un mascara preto y poco shinishi na skina pafo di su wowo, e piek ta punta fini stret color preto. E subespecie C.m. caribaeus ta distribui den e area nord di Venezuela y islanan ABC.
E habitat na unda ta encontra blenchinan ta den zonanan tropical y subtropical, den paisnan cu tin sabana, areanan cera cu cultivo y tambe den hardinnan yena cu flor. Eyden nan ta busca nectar pa chupa.
C.m. caribaeus, ta broei den cualkier temporada di aña. E blenchi ta traha un neishi den forma di un copi chikito traha di catuna y seda di cas di haraña.
E blenchi embra ta broei dos webo pa ongeveer 19 dia y despues di 20 dia e webo ta kibra. Algun di esfuersonan pa conservacion ta encera proteha y restaura habitatnan natural manera mondinan y areanan di ‘wetlands’.
Practica di agricultura sostenibel cu ta minimalisa uzo di pesticida. Monitor y haci estudionan di populacion di blenchinan y desaroya strategianan pa conservacion efectivo. Conscientisacion di e importancia di blenchinan ta keda importante pa nan sobrevivencia.
