Promotor grandi di Festival di Dande
ORANJESTAD (AAN): Diamars mainta, e tristo noticia a drenta cu e conocido periodista y promotor, Harry Croes a fayece despues di a lucha algun tempo cu malesa. E ciudadano residencia na Kas Ariba tin 74 aña di edad.
For di hoben caba, Harry Croes a mustra interes grandi den deporte di Boxeo, y asina activamente a haye ta activo den e disciplina aki, y a haci su debut dia 18 di October 1968, den division peso liviano. E experiencianan aki a yude posteriormente pa bay den e direccion di bira referee, cu ta e persona encarga pa cumpli cu reglanan di e deporte aki durante un encuentro. El a bira referee afilia na e Conseho internacional di WBC, y e.o. na 1987 tabata e referee principal pa un Programa di Boxeo di WBC teni na Kingston, Jamaica.
Den mundo di periodismo, Harry Croes semper canando cu su camera a traha tambe pa e corant ‘Prome’ cu tabatin su sede y imprenta na Savaneta. Ademas di cubri eventonan deportivo, el a sa di obtene potretnan di casonan grandi durante fin di decada di 1970.
Ora cu DIARIO a habri na 1980, Harry Croes a bin uni cu e ekipo di redaccion, y a fungi como Redactor tambe. E tabata haci raportahenan investigativo y trece informenan e tempo ey den e lucha di Aruba pa logra su libertad. Harry tabata un persona cu semper tabata contra e dominio di poder cu Antiyas tabatin riba finanzas di Aruba, y pesey a sostene Betico Croes grandemente e tempo aya.
Harry como un berdadero yiu di tera, tabata stima cultura tambe di Aruba. Asina mes el a converti su mes den promotor, mirando e hecho cu na comienzo di decada di 1970 cu e interes den tradicion di Dande tabata cayendo, Harry Croes a dicidi na haci algo y riba su mes a bin cu e idea pa organiza un ‘Festival di Dande’. Su prome tabata na 1973 y di e forma ey ta centenares di hende a aglomera na e.o. Tereno di Feria na Santa Cruz pa mira kende ta wordo corona como Rey di Dande. Despues di tempo a agrega premio tambe pa Reina di Dande.
Ademas di Dande, a cuminza organiza Festival Himno y Bandera tambe. Algun aña pasa, Harry Croes a pasa e organisacion di Fundacion Cultural di Festivalnan Folclore, Dande y Himno y Bandera over pa su yiu muher Jessica Croes. Pero e tabata keda como un persona cu cada rato ta disponible pa duna conseho.
Harry Croes a nace dia 15 di October 1948, y a bay laga su famia, incluyendo su casa Ligia, su yiu- y nietonan. DIARIO ta manda palabranan di condolencia y ta desea nan forza e momentonan aki.
