ORANJESTAD (AAN): E siman aki e noticia tristo a drenta, cu un di e comerciantenan cu tabatin durante un epoca, un di e Supermarketnan mas exitoso na Aruba, a fayece.
Ta trata aki di Carol Moore, kende ta mas hopi conoci pa su compania ‘Moore Trading’ cu el a habri na October 1964 den Windstraat na Playa. E tabata opera un tempo tambe den Nassaustraat.
Moore Trading tabata importador di hopi producto y comestible pa Aruba, y tabata suministra mercancia pa varios tienda, supermarket, y shapnan rond di e isla.
Na 1975 el a habri tambe Fiesta Trading Company den Fergusonstraat, cu tabtaa importa surtido di comestibles, como tambe material di papel y carton, y mas. A base di esey el a habri na 1985 su Fiesta Shopping Center cu tabata den Dakota Shopping Paradise.
Tambe el a co-funda “Moore Supermarket” na 1997, y tambe “Estrella Dakota Supermarket”, cu el a habri na April 1979.
Nan tabata estableci prome den Dakota Shopping Paradise, y tambe despues den e edificio net na e cruzada di Rondweg y Fergusonstraat (awendia nan yama Caya Huan Pablo II y Avenida Milio Croes).
Estrella Dakota Supermarket a logra haya un fiel clientela cu ta bin for di tur distrito di Aruba, pa haci compras. Tur weekend tabata haya monton di hende ta haciendo compras eyden. Y ora cu e publica oferta special riba Caha di Pia di Galiña di 5 lbs., bo tabata haya rij di hende para pafo ta warda lugar habri pa nan cumpra.
E Supermarket cu el a habri na comienzo di Rondweg tabata funciona sin airco, como un tactica pa yuda mantene prijs abao. Solamente e parti di beleg y carniceria tabatin airco. Hendenan na cantidad ta bay aya pa cumpra e.o. papel di WC, cuminda pa cacho, y carni fresco. Pero tragedia a impacta e negoshi, ora cu un candela grandi a destrui Estrella Dakota Supermarket ey.
Despues di esey, Carol Moore na Juli 1997 a desaroya “Fiesta Park”, un parke di diverticion net riba Irausquin Boulevard, pabao di Bubali Plas. Esaki no a bay den e direccion desea, y pesey despues hasta e Supermarket a bay habri eyden. E parke aki despues a wordo bendi na vindishi.
No obstante esey, el a keda activo cu bendemento di articulo ultimo añanan, y regularmente ta pone propaganda y anuncio den DIARIO. E ta un persona cu semper bon sentido di humor, cu un curazon di oro y semper cla pa yuda su prohimo. Su deseo semper tabata pa yuda pueblo di Aruba cu e mihor producto, na e prijs di mas competitivo.
Carol Ferdinand Moore, mihor conoci como ‘Chito’, a nace na Aruba dia 18 di December 1939, pues a fayece cu 82 aña di edad. El a bay laga su casa, yiunan, nietonan, y varios ruman.
DIARIO a compronde cu entiero ta Diabierna awor den oranan di atardi. Oportunidad pa condoleer ta Diahuebs anochi na Royal Funeral Home.
Na famia y amigonan di Chito Moore, DIARIO ta extende su mas profundo palabra di condolencia.
