Minister Rocco Tjon:
*Esaki pa garantiza seguridad durante carnaval
ORANJESTAD (AAN) – Diahuebs mainta Gobierno a tene su di dos conferencia di prensa semanal, e biaha aki cu participacion di Minister di Husticia y Asunto Social Rocco Tjon, Minister di Labor, Energia y Integracion Glenbert Croes y director di NV Elmar Tico Koolman.
Na prome lugar, Minister Rocco Tjon a hiba palabra despues di a presenta un video, cu ta splica tur aspecto di e proyecto di seguridad, cu gobierno ta implementando pa e temporada aki di carnaval.
E mandatario a remarca cu e proyecto aki ta hopi importante pa garantiza seguridad durante e paradanan di carnaval.
Tjon a bisa cu esaki ta e prome biaha cu Ministerio di Husticia ta ehecuta proyectonan di e indole aki, y a haci esaki den cooperacion cu NV Elmar, pa e ta exitoso. El a agrega cu ta imposible pa ehecuta esaki door di un ministerio so, y pesey e ta hopi gradici pa colaboracion y contribucion cu Minister Glenbert Croes a duna pa cu esaki. “Den union nos ta percura pa proyectonan positivo pa henter e pueblo di Aruba”, e dignatario a expresa.
E mandatario a splica cu esaki ta e proyecto piloto cu gobierno ta ehecuta aworaki cu NV Elmar. “Nos ta trahando caba riba e siguiente fase di e proyecto di camara den su totalidad, y esey nos ta bay ehecuta hunto cu Elmar tambe. Esaki ta pa garantiza seguridad, muy en particular seguridad den trafico”, Minister di Husticia a indica.
El a indica cu e prome fase hunto cu Setar NV a wordo ehecuta caba, cual ta “beach side” den area di hotel. Ayera nan a aproba e NVnan pa por ehecuta fase 2 y 3. Fase 2 ta bay ta e hot zona, den e area hotelero tambe. Instalacion di e camaranan aki lo cuminza e luna aki y a aproba tambe e instalacion di camaranan den e ciudad di San Nicolas y e cayanan cu ta conecta cu e Caya Principal na San Nicolas. Esaki lo cuminza otro siman caba, Minister Tjon a menciona.
E dignatario a bisa cu e proyecto piloto aki, despues nan lo evalue, lo sigui pa e fase 4 hunto cu NV Elmar pa loke ta e careteranan publico pa di e forma aki garantiza seguridad den trafico tambe.
E mandatario un biaha mas a gradici Minister Glenbert Croes y obviamente NV Elmar, pa nan confianza pa cu e proyecto aki, cu e ta sigur cu lo ta uno exitoso.
