ORANJESTAD (AAN) – Organizacion Cabesantenan Scol Basico (OCEB), a reuni cu Formador Evelyn Wever-Croes, como stakeholder den area di Economia y Enseñanza. Esaki den e cuadro di e proceso di formacion di gobierno nobo.
Juffrouw Maritza Carrion, den conferencia di prensa, a relata con e encuentro aki cu Formador a desaroya.
Na prome lugar el a expresa palabranan di danki pa a duna OCEB e oportunidad di trece puntonan dilanti cu ta concerni scolnan basico y preparatorio y el a subraya cu nan ta conciente cu diferente stakeholder, posiblemente a trece e mesun puntonan dilanti, pero tambe tin puntonan cu no tabata conoci pa Formador.
Carrion a señala cu OCEB ta contento cu por a presenta un lista di puntonan di mehoracion, y Formador su Team tabata habri pa scucha e puntonan aki.
OCEB a haya preguntanan cu nan a contesta con leu cu nan tabata por, Juffrouw Carrion a bisa.
“Nos a bay cu e confianza cu e proximo minister di enseñanza por haci un cambio den nos sistema di educacion, pa hacie mas practico y por ta, crea positivismo y innovacion den nos enseñanza”, Juffrouw Maritza Carrion a indica.
Carrion a splica cu tin cambionan den enseñanza cu e mes cu tin mas cu 20 aña den e veld caba, ta wardando pa decadanan. E ta spera cu na un forma strategico y practico e proximo gobierno por aplica cambionan, mas tanto posible.
“Nos ta conciente cu cierto cambionan no ta asina facil pa logra, pero nos ta spera cu sikiera, di e lista di 25 punto cu nos a trece, por logra un parti den e proximo cuater añanan”, Juffrouw Carrion a acentua.
Un di e prioridadnan cu tin riba e lista aki ta mantencion di e edificionan escolar, pasobra si no haci esaki regularmente, e edificionan ta bay atras drasticamente, y lo costa gobierno mas placa, cu si tin mantenimento regular.
Otro punto ta e trahadornan pa sostene scol, no solamente maestro y cabesantenan pero otro sostenedornan cu ta hopi importante.
Tambe e asunto di pensionadonan, cu durante e ultimo gobernacion a bay cas, wak si kizas nan por pensa un biaha mas pa no kita e posibilidad pa nan keda yuda den enseñanza.
Juffrouw Carrion a comenta cu gran parti di e pensionadonan aki tabata reemplazante, y nan tabata sostene e muchanan cu tin un tiki problema den nan desaroyo y gran parti di nan tambe ta esnan cu a tuma e klas ora e maestronan ta malo. “E situacion di covid a haci cu e ausencia pa malesa tabata mas halto e ultimo aña escolar, y nos no tabata tin e personanan aki pa yuda nos den scol”, Juffrouw Carrion a señala.
